AQSH-tyń burynǵy prezıdenti Djo Baıden metastazdy qýyq asty beziniń qaterli isiginiń agressıvti túrine em qabyldaý saldarynan qatty álsiregen. Sonymen birge terapıa oń nátıje berip otyr. Bul týraly saıasatkerdiń aınalasyndaǵy derekkózderge silteme jasaǵan The Washington Post basylymy habarlaıdy, dep jazady infohub.kz.
The Washington Post basylymynyń dereginshe, qazir 83 jastaǵy Baıdenniń ómiri negizinen medısınalyq prosedýralardyń aınalasynda ótýde. Aq úıdiń burynǵy basshysy otbasy, jaqyn dostary jáne burynǵy kómekshileriniń ortasynda ýaqyt ótkizip, qoǵamdyq is-sharalarda sırek kórinedi.
Gazettiń suhbattastary emdeý nátıje berip jatqan sıaqty ekenin, alaıda aýrýdyń ózi men terapıanyń janama áserleri eks-prezıdenttiń fızıkalyq kúıine aıtarlyqtaı áser etkenin atap ótedi.
The Washington Post sondaı-aq densaýlyq problemalary Baıdenniń birqatar josparlarynyń júzege asýyn qıyndatqanyn jazady. Atap aıtqanda, Delaver shtatynda prezıdenttik kitaphana qurýǵa qarjy jınaý qıynǵa soǵýda, sondaı-aq 17 qarashaǵa josparlanǵan onyń estelik kitabyn qoldaý týry kúmán týdyrýda.
Baıdenniń dıagnozy týraly byltyr mamyr aıynda belgili boldy. Sonda onyń baspasóz qyzmeti burynǵy prezıdentte súıek tinine metastaz bergen qýyq asty beziniń qaterli isiginiń agressıvti túri anyqtalǵanyn habarlady.
Keıin Baıden eldegi jetekshi mamandardyń biriniń baqylaýymen emdeýge kiriskenin jáne dárigerlerden qolaıly boljam alǵanyn aıtty. Sondaı-aq ótken aıda oǵan teridegi qaterli isik jasýshalaryn alyp tastaý operasıasy jasaldy.
The Washington Post atap ótkendeı, metastazdy qýyq asty beziniń qaterli isigi emdelmeıtin aýrý bolyp sanalady, alaıda zamanaýı terapıa ádisteri onyń damýyn báseńdetýge jáne pasıentterdiń ómir súrý sapasyn jaqsartýǵa múmkindik beredi.