Parıjdiń Givenchy jáne Christian Dior sán úılerinde jumys istegen aty ańyzǵa aınalǵan sánger Djon Galáno mass-market brendi Zara úshin alǵashqy koleksıasyn shyǵardy. Jańa naýqannyń prevúin Vogue jýrnaly jarıalady, dep habarlaıdy infohub.kz saıty.
Koleksıa Re{form} Zara Authored by the Couturier John Galliano dep ataldy. Dızaıner negizge Zara-nyń daıyn zattaryn alyp, olardy qaıta oılastyryp, pishinin, proporsıasyn jáne bólshekterin ózgertti.
Mysaly, jún paltosyn qaıta piship, qaltalarynyń ornalasýyn, qaýsyrmasynyń pishinin jáne tómengi bóliginiń uzyndyǵyn ózgertti. Krýjevo áshekeıli kombınasıa kóılegin moıyn tóńireginde kólemdi bólshegi bar modelge aınaldyrdy, al maqta jeıdesin XXXL–XXXXL ólshemderine deıin úlkeıtip, odan terige eliktegen prınti bar jaket jasady.
Galánonyń aıtýynsha, jumysynda ol «resemplıng jáne sıfrlyq mıkshırovanıe» prınsıpin qoldanǵan: dızaıner bar zattardy alyp, olardy qaıta jınady. Koleksıada móldir túlden jasalǵan modelder, tarıhı kostúmderge silteme jasaıtyn jaketter men aksesýarlar da paıda boldy.
Atap aıtqanda, Vogue jazýynsha, dızaıner Fransýz revolúsıasy dáýiriniń beınelerine — les Incroyables jáne les Merveilleuses sılýetterine júgingen. Bul motıvter onyń 1984 jyly Central Saint Martins-tegi koleksıasynda da kezdesken.
Zattardyń baǵasy $29,90-nan (shamamen 14,4 myń teńge) bastalady. Salystyrý úshin, Galánonyń Christian Dior úshin jasaǵan kýtúr jumystarynyń biri 2026 jyldyń qańtarynda €663 myńǵa (shamamen 380 mln teńge) satylǵan.
Dızaınerdiń Zara-men yntymaqtastyǵy eki jylǵa josparlanǵan jáne tórt koleksıa shyǵarýdy kózdeıdi. Galáno úshin bul joba 2024 jyly Maison Margiela-dan ketkennen keıingi alǵashqy iri jumysy boldy.
Re{form} Zara Authored by the Couturier John Galliano alǵashqy koleksıasy álemdegi Zara býtıkterine jetýi tıis.
Buǵan deıin Kursiv LifeStyle Metropolıten-mýzeı men Anna Vıntýrdyń brıtan dızaıneriniń retrospektıvasyn nege toqtatqanyn jazǵan bolatyn.