Burynǵy joqtaý úlgisi.
Alty atasy baı ótken,
Alty atanǵa júk artqan.
Jeti atasy baı ótken,
Jeti atanǵa júk artqan.
Uıada suńqar túletken,
Qıada suńqar túletken.
Altaıy qyzyl túlki artqan,
Qıadan baryp tike atqan.
Barshany bózdeı jyrttyrǵan,
Jibekti júndeı túttirgen.
Qonaq qonsa: «Qon!» - degen,
«Qoı semizin soı!» - degen.
Toıǵa qazan astyrǵan,
Jaqsylyqqa kózin jetkizgen,
Shylaýshyn (syılaý shyn) salyp, at mingen,
Shyńyraýdan alyp, sý ishken,
Shynjyrly qaýǵa taqtyrǵan.
Qaıyńnan astaý shaptyrǵan,
Qaptatyp jylqy japtyrǵan.
Aıdarlyǵa aıdatqan,
Tulymdyǵa baılatqan.
Qalmaqtan jylqy qýdyrǵan,
Qulynyn jolda týdyrǵan.
Jambasynan otyrǵan,
Sanama juldyz batyrǵan!
Bes taqa barshadan ton qylǵan,
Jeti rýdan qol jıǵan.
Áýelde kudaı qalaǵan,
Asyly nurdan taraǵan.
Aq suńqardaı túlegen,
Toıaty onyń qanǵan soń.
Alystan toıat tilegen!
Alystan dushpan attansa,
Qar-jańbyrdaı boraǵan.
Jaqynnan dushpan attansa,
Qart býradaı jaraǵan.
Barǵanda, tóre tanyǵan,
Qaıtqanda, qara qamaǵan.
Qarasy men tóresi
Qamap aqyl suraǵan.
Tobyqtynyń bıi edi
Seksenge kelgen Keńgirbaı.
Enshiń toldy paraǵa.
Paradan alǵan kóp maqpal
Ólgende jaıyldy qaraǵa.
Eki jurtqa jem qylyp,
Ylajyń ne dúr Allaǵa ?!
Aıdynyń Alataýdaı bar edi,
Qaıratyń Qarataýdaı bar edi.
Kárip penen qaterge
Saýyp turǵan bıe ediń.
Jetim menen jesirdiń
Aıttyrmaı muńyn biledi.
Tolarsaqtan saz kelse,
Qajymaı oǵan kúledi.
Arǵyn-Naıman - Orta júz
Qylyshyn janaı júredi.
Tuǵyrǵa qalǵan suńqary,
Sýytyp qoıǵan tulpary.
Alpys basty aq orda,
Aq suńqar úıde turǵan-dy,
Kúni de túni bazarym,
Alladan qaıtty nazarym!
Betimnen ketti ajarym!
Han ıemiz ketkende,
Bir kúnde ketti bazarym!
Jazdygúni bolǵanda,
Kúnniń kózi baılanǵan,
Aq suńqar ushyp aınalǵan!

---