Qazaqstandyq ártis Qaırat Nurtas 27 qyrkúıekte Astana Arena sahnasynda óner kórsetip, shyǵarmashylyǵynyń 20 jyldyǵyn úlken jeke konsertimen atap ótti. Kesh bastalar aldynda kórermender Kaspıde qaza tapqan áskerılerdi bir mınýt únsizdikpen eske aldy, dep habarlaıdy infohub.kz saıty.
Ánshi elordadaǵy stadıondy tolyq jınap, jankúıerlerimen birge shyǵarmashylyq qyzmetiniń 20 jyldyq mereıtoıyn toılady. Konsert bastalar aldynda ártis Kaspıde qaza tapqan jas áskerılerdi bir mınýt únsizdikpen eske alýdy ótindi.
«Konserttiń ashylýy. Bir mınýt únsizdik. 35 myń adam. Tynyshtyq. Qazaqstandyqtar aman-esen bolsyn», — dep jazdy ánshiniń anasy ári prodúseri Gúlzıra Aıdarbekova.
Qaırat Nurtas jankúıerlerin jańa ánderimen, túrli-tústi kostúmderimen jáne qaýipti trúkterimen tań qaldyrdy. Kórermenderdiń aıtýynsha, bul naǵyz shoý boldy.
«Raqmet, Astana! 35 myń kórermen. Bir stadıon. Bir júrek. Bul umytylmas kesh boldy», — dep alǵys aıtty jankúıerlerine Qaırat Nurtas.
Jankúıerler kóptegen jyly lebizder qaldyrdy: «Bravo! Tamasha konsert boldy», «20 jyldan beri ańyz! Konsert emes, ertegi! Án salyp, ornynda otyra almaı, bıge bastyq», «Sóz joq, sen naǵyz shoý jasadyń», «Arena toly, tiri daýys, keremet atmosfera — búkil stadıon án salyp, bıledi! Qaırat Nurtas, bul qýatty boldy».
4 qazanda ártis Almatyda konsert beredi. Ol sondaı-aq Shymkent, Qyzylorda, Atyraý jáne Aqtóbede óner kórsetedi.