Qazaqstan premer-lıgasynyń 19-týryndaǵy «Qaırat» pen «Ordabasy» arasyndaǵy ortalyq mach aldynda Almaty polısıasy jankúıerlerge tártip saqtap, arandatýshylyqqa berilmeýge shaqyrdy, dep habarlaıdy infohub.kz saıty.
Stadıon men oǵan irgeles aýmaqta qaýipsizdikti polısıa qyzmetkerleri, Ulttyq ulan áskerıleri jáne basqa da qyzmet ókilderi qamtamasyz etedi. Jaǵdaıdy baqylaý úshin beınebaqylaý kameralary da qoldanylady.
Polıseıler agressıvti minez-qulyq, tyıym salynǵan atrıbýtıkany paıdalaný, bylapyt sóıleý jáne janjal týdyrý áreketteri ákimshilik jaýapkershilikke ákep soǵýy múmkin ekenin eskertti.
Almaty PD Qoǵamdyq qaýipsizdik basqarmasynyń bastyǵy Tımýr Nogaıbaev jankúıerlerdi súıikti komandalaryn mádenıetti túrde qoldaýǵa shaqyrdy: «Almatyǵa óz komandalaryn qoldaý úshin kelgen barlyq jankúıerlerdi qarsy alýǵa qýanyshtymyz. Bizdiń ortaq maqsatymyz — bul mach ádemi oıyn, jarqyn emosıalar jáne bir-birine qurmetpen eske qalýy. Barlyǵyn qoǵamdyq tártipti saqtaýǵa, arandatýshylyqqa berilmeýge jáne naǵyz jankúıerdi mádenıet, qarsylasqa qurmet jáne óz komandasyn shynaıy qoldaý ereksheleıtinin este saqtaýǵa shaqyramyn. Óz tarapymyzdan polısıa machqa qatysýshylar men kórermenderdiń qaýipsizdigin qamtamasyz etý úshin barlyq qajetti sharalardy qabyldaıdy», — dedi ol.
Polısıa kezdesýdiń oqys jaǵdaısyz ótetinine senedi, al kórermender ony trıbýnalardaǵy janjaldar emes, komandalardyń oıyny arqyly eske alady dep kútilýde.
Mach 26 shilde, jeksenbi kúni saǵat 19:00-de ótedi. Chempıonat kóshbasshylary alańǵa shyǵady: «Ordabasy» 43 upaımen týrnır kestesin bastap tur, al 42 bal jınaǵan «Qaırat» ekinshi orynda. Mach nátıjesi birinshi oryn úshin kúreste kúshterdiń araqatynasyn ózgertýi múmkin.