AQSH-tyń Kalıfornıa shtatynda, Los-Andjeles qalasynyń mańyndaǵy Katalına aralynyń túbinde medısınalyq tikushaq apatqa ushyrap, eki adam qaza tapty, taǵy ekeýi aýrýhanaǵa jatqyzyldy, dep habarlaıdy infohub.kz saıty.
Los-Andjeles okrýginiń órt sóndirý qyzmeti áleýmettik jelidegi jazbasynda beısenbi kúni tańerteń ushaqta bolǵan jáne iz-túzsiz joǵalǵan besinshi adamdy izdeý jumystary júrgizilip jatqanyn málimdedi.
Qutqarýshylar sársenbi kúni keshke saǵat segizge taıaý apat bolǵan jerge shaqyrylyp, sýdan tórt adamdy alyp shyqty. Órt sóndirý qyzmetiniń habarlaýynsha, ekeýi oqıǵa ornynda qaza tapty, taǵy ekeýi turaqty jaǵdaıda materıktegi aýrýhanalarǵa jetkizildi.
«Bul — túni boıy jalǵasqan izdeý-qutqarý jumystary júrip jatqan belsendi aımaq», — dedi vedomstvo.
Ulttyq kólik qaýipsizdigi keńesi apatqa qatysty tergeý júrgizip jatqanyn habarlady.
Los-Andjeles okrýginiń ákimshisi Djenıs Han óziniń X jelisindegi jazbasynda medısınalyq evakýasıalyq tikushaq Katalınadan ushqannan keıin kóp uzamaı apatqa ushyraǵanyn estigenin aıtty.
Resmı ókilderdiń málimdeýinshe, oqıǵa ornyna okrýgtiń órt sóndirýshileri men qutqarýshylary, sondaı-aq AQSh jaǵalaý kúzeti men sherıf qyzmeti jumyldyryldy.
Bılik ókilderi tikushaq Katalınanyń túbinde 240 fýt (73 metr) tereńdikte sýǵa batqanyn aıtty. Aral Los-Andjeles okrýginiń materıginen shamamen 22 mıl (35 shaqyrym) qashyqtyqta ornalasqan.
KTLA-TV telearnasynyń habarlaýynsha, tikushaq Kalıfornıa shtatyndaǵy Sakramento qalasynda ornalasqan Reach Air Medical Services kompanıasyna tıesili bolǵan.