Kanada AQSH-tan ákelinetin taýarlarǵa 15%, 25% jáne 50% mólsherinde jaýap baj salyǵyn engizetinin habarlady, dep habarlaıdy infohub.kz.
Kanada qarjy mınıstrliginiń málimetinshe, jańa baj salyǵy bolat, elektronıka, sút ónimderi, aýyl sharýashylyǵy tehnıkasy, turmystyq tehnıka jáne selúloza-qaǵaz ónerkásibin qamtıdy. Shekteýge iligetin taýarlardyń jalpy kólemi 20 mıllıard AQSh dollaryna baǵalanyp otyr.
Úkimet málimdemesinde: «2026 jyldyń 8 qyrkúıeginen bastap Kanada taýarlarǵa 15%, 25% jáne 50% mólsherinde baj salyǵyn engizedi... Kanadanyń jaýap baj salyǵy AQSH-tan ákelinetin 27,6 mıllıard kanada dollary (19,9 mıllıard AQSh dollary – red.) kólemindegi ónimge qoldanylady jáne negizinen bolat, sút ónimderi, turmystyq tehnıka, aýyl sharýashylyǵy tehnıkasy, selúloza-qaǵaz ónerkásibi jáne elektronıka sıaqty AQSh baj salyǵynan kóbirek zardap shekken sektorlarǵa baǵyttalady», — delingen.
Sonymen qatar, Kanada bıligi baj salyǵynyń engizilýinen zardap shegýi múmkin jergilikti kásipkerler men jumysshylardy qoldaý úshin 5,4 mıllıard AQSh dollary bólinetinin jeke habarlady.
Buǵan deıin Kanada premer-mınıstri Mark Karnı Ottava AQSH-qa qatysty «dollarǵa dollar» prınsıpi boıynsha jaýap baj salyǵyn engizetinin málimdegen edi. Buǵan jaýap retinde AQSh prezıdenti Donald Tramp Kanada saıasatyn sátsiz dep atap, el basshylyǵyn, onyń ishinde premer-mınıstr Mark Karnı men Ontarıo provınsıasynyń premeri Dag Fordty quzyretsiz dep synady.