Kanadalyq Porter Airlines áýekompanıasy Vankýver aralyndaǵy Vıktorıadan Torontoǵa ushatyn reısin balanyń qaýipsizdik beldigin taqpaýyna baılanysty toqtatty. Bul týraly infohub.kz saıty habarlaıdy.
6 tamyzdaǵy reıs ushý-qoný jolaǵyna taksılep bara jatqanda, bala oryndyqta turyp alǵan. Eresek adam men ekıpajdyń birneshe áreketine qaramastan, balany otyrǵyzý múmkin bolmaǵandyqtan, ekıpaj termınalǵa qaıtyp oralyp, eki jolaýshyny ushaqtan túsirýge sheshim qabyldaǵan. Áýekompanıanyń málimetinshe, mundaı qaýipti jaǵdaıda ushaq usha almaıdy.
Áýekompanıa ókili Bred Sısero Canadian Broadcasting Corporation (CBC) telearnasyna bergen suhbatynda, barlyq jolaýshylar ushaqtan túsýge májbúr bolǵanyn, sebebi tek bala men ata-anasyn túsirip, qujattardy qaıta resimdeýge ketken ýaqyt ushaqtyń 12:30-da jabylatyn áýejaıǵa deıin ushyp ketýine múmkindik bermegenin aıtty. Ol basqa jolaýshylarǵa keltirilgen qolaısyzdyq úshin keshirim surap, olar kelesi kúni reıspen usha alǵanyn jetkizdi.
Jolaýshy Are Kozých Canadian Press agenttigine bergen suhbatynda, balanyń tártipsiz bolmaǵanyn, al áleýmettik jelide ata-anany synaǵan pikirler jaǵdaıdy tolyq kórsetpeıtinin aıtty. Onyń aıtýynsha, bala oryndyqtyń astyna tyǵylyp, beldik taǵýǵa májbúrlegende syrǵyp shyǵyp ketken. "Bul 150 adam otyrǵan ushaqtaǵy bala edi... Ol qatty qorqyp, aldyndaǵy oryndyqtyń astyna tyǵylǵan. Bul júgirip júrip aıǵaılaǵan baladan múlde bólek jaǵdaı", - dedi ol.
Taǵy bir jolaýshy Hılları Hersberg áýekompanıanyń baıaý áreket etkenin aıtty. "Bul óte uzaqqa sozyldy. Bala ushaqtan 11:30-da tústi, sol kezde biz ushaqta bir saǵatqa jýyq otyrǵanbyz", - dedi ol CBC-ge. Porter Airlines jolaýshylardy kelesi kúngi basqa reıske qaıta tirkegenin habarlady.