Qandyaǵashtaǵy «Tumar» meıramhanasynyń aspazdarynan, as úı qural-jabdyqtarynyń betterinen jáne aýyz sýynan altyn stafılokokk pen ishek taıaqshasynyń bakterıalary tabyldy, dep habarlaıdy infohub.kz saıty.
Sanıtarıalyq dárigerler Aqtóbe oblysy Qandyaǵashtaǵy «Tumar» meıramhanasyndaǵy jappaı ýlaný boıynsha epıdemıologıalyq tergeýdi aıaqtady. Materıaldar polısıaǵa berildi.
Zerthanalyq taldaýlar ınfeksıa kózi aspazdardyń ózderi ekenin kórsetti. Meıramhana qyzmetkerlerinen altyn stafılokokk (Staphylococcus aureus) anyqtaldy. İshek taıaqshasy as úı jabdyqtarynyń betterinen, daıyn taǵamdardan jáne aýyz sýdan tabyldy.
«Zardap shekkenderden stafılokokk pen ishek taıaqshasy tabyldy, bul stafılokokktyq taǵamdyq toksıkoınfeksıa men jedel ishek ınfeksıalaryn kórsetedi», — dedi Aqtóbe oblysy sanıtarıalyq-epıdemıologıalyq baqylaý departamenti basshysynyń orynbasary Janserik Qulmanov.
Mamandar óreskel buzýshylyqtardy anyqtady. Aspazdar taǵamdy tehnologıany buza otyryp daıyndaǵan, ónimderdiń qaýipsizdigi týraly qujattary bolmaǵan, dezınfeksıa júrgizilmegen, al personal mindetti medısınalyq tekserýden ótpegen. İs QR Qylmystyq kodeksiniń 304-baby boıynsha polısıaǵa berildi.
Barlyq zardap shekkender aýrýhanadan shyǵaryldy. Buǵan deıin «Tumar» meıramhanasyna barǵannan keıin 100-den astam adam medısınalyq kómekke júgingeni habarlanǵan. Qonaqtar eki kún qatarynan meıramhanada ótken aza men toıǵa qatysqan. Ýlanǵandar Muǵaljar aýdandyq aýrýhanasy men Aqtóbedegi oblystyq juqpaly aýrýlar aýrýhanasyna jatqyzyldy. Meıramhana sol kúni jabyldy. Kináliler 2 jylǵa deıin bas bostandyǵynan aıyrylýy múmkin.