Álemge áıgili reper Kane Ýestiń Almatydaǵy konserti resmı túrde rastaldy. Qala ákimdigi men qazaqstandyq konserttik agenttik óner kórsetý týraly aqparatty rastady, dep habarlaıdy infohub.kz.
Buǵan deıin ártis menedjeri Djozef Karre konserttiń yqtımaldyǵy jaıly aıtqan edi. Endi óner kórsetý 14 tamyzda saǵat 21:00-de Ortalyq stadıonda ótetini belgili boldy. Qazaqstandyq marketıńtik holdıń First Media Group Instagram-da afısha jarıalap, bul Kane Ýestiń Qazaqstandaǵy jalǵyz konserti ekenin kórsetken. Bılet satylymy 20 shildede saǵat 12:00-de bastalady.
Ye degen atpen de tanymal Kane Ýest — amerıkandyq reper, mýzykalyq prodúser jáne dızaıner. Ol 1977 jyly 7 maýsymda AQSH-tyń Djordjıa shtatyndaǵy Atlanta qalasynda dúnıege kelgen. Ýest Chıkagoda ósip, qalalyq hıp-hop qaýymdastyǵyna qatysqan. Úshinshi synypta rep oqı bastap, jetinshi synypta bıtter jasaı bastaǵan. 1996 jyly onyń aty alǵash ret chıkagolyq reper Grav-dyń Down to Earth álbomynda paıda boldy, Ýest bul álbomǵa birneshe bıt jazǵan.
2004 jyldyń aqpanynda ol The College Dropout atty alǵashqy álbomyn shyǵardy, ol birden Billboard 200 chartynda ekinshi orynǵa kóterildi. Through the Wire sıngly Billboard Hot 100-de 15-shi orynda bes apta turdy. Álbom AQSH-ta úsh ret platınalyq atandy jáne Ýestke 2005 jyly «Gremmıdiń» on nomınasıasyn áperdi, onyń ishinde «Úzdik rep-albom» kategorıasyn qosa alǵanda úsh sanatta jeńiske jetti.
Kane Ýest — eń kóp ataqtarǵa ıe ártisterdiń biri: mansabynda 75 ret «Gremmıge» usynylyp, 24 músinshe alǵan. 2005 jáne 2015 jyldary Time jýrnalynyń álemdegi eń yqpaldy 100 adamy tizimine eki ret engen.