14 tamyzda Almatydaǵy Ortalyq stadıonda Ye (Kane Ýest) konserti ótedi. Qala qyzmetteri is-sharaǵa daıyndalyp, kórermenderge yńǵaıly kólik uıymdastyrdy, dep habarlaıdy infohub.kz saıty.
Konsertten keıin qonaqtardy 60 tegin shattl tasymaldaıdy. Olar stadıonnyń janynda kútip turyp, alty baǵyt boıynsha júredi: «Almaty Arena» — 10 avtobýs; Raıymbek batyr / «Alataý» metro stansıasy — 10 avtobýs; Almaty-1 temirjol vokzaly — 5 avtobýs; Orbıta — 5 avtobýs; Juldyz shaǵyn aýdany — 10 avtobýs; Almaty halyqaralyq áýejaıy — 10 avtobýs.
«Sonymen qatar, qoǵamdyq kólik pen metropolıten jumysy kúsheıtiledi. „Baıqońyr“ metro stansıasy saǵat 21.00-de jolaýshylar úshin jabylady. Konsertke kelýshilerge „Abaı“ jáne „Muhtar Áýezov atyndaǵy teatr“ stansıalaryn paıdalanýdy usynady. Metro jumysy keminde saǵat 01.00-ge deıin, qajet bolǵan jaǵdaıda 03.00-ge deıin uzartylady», — delingen habarlamada.
Saǵat 16.00-den bastap stadıon mańyndaǵy kólik qozǵalysyn birtindep shekteı bastaıdy. Baıtursynov, Sátpaev kósheleri men Abaı dańǵylynyń keıbir bólikteri jabylady.
Polısıa qyzmetkerleri oqıǵa ornynda qozǵalysty retteıdi. Qala turǵyndary men qonaqtaryna marshrýtty aldyn ala josparlap, qoǵamdyq kólikti paıdalanýdy keńes beredi.
Buǵan deıin Kursiv LifeStyle Kane Ýesttiń (Ye) Portýgalıadaǵy «Algarve» stadıonynda óner kórsetip, shamamen 34 myń kórermen jınaǵanyn jazǵan bolatyn. Oǵan deıin Kaneniń gаstrólderi Ulybrıtanıa, Fransıa, Polsha, Italıa jáne Chehıada bolmaı qalǵan, al Avstralıa ártiske kirý vızasyn berýden bas tartqan edi.