Amerıkandyq reper Kane Ýest (Ye) Portýgalıadaǵy «Algarve» stadıonynda óner kórsetip, shamamen 34 myń kórermen jınady. Bul onyń Almatydaǵy kópten kútken konserti aldyndaǵy mańyzdy daıyndyq boldy, dep habarlaıdy infohub.kz saıty.
Buǵan deıin ártis Ulybrıtanıa, Fransıa, Polsha, Italıa jáne Chehıadaǵy gаstrólderi toqtatylǵan edi, al Avstralıa oǵan kirý vızasyn berýden bas tartty. Portýgalıada da konsertti ótkizbeý týraly úndeýler aıtyldy, atap aıtqanda, Izraıl elshisi bul bastamany jarıa túrde qoldady. Alaıda uıymdastyrýshylar konsertti keıinge shegerýden nemese ótkizbeýden bas tartty, nátıjesinde is-shara tynysh ótti.
Ye sahnaǵa belgilengen ýaqyttan shamamen 45 mınýt kesh shyqty. Shoý barysynda ol óziniń eń tanymal hıtterin oryndady, sonyń ishinde Stronger, Gold Digger jáne American Boy, sondaı-aq sahnaǵa qyzy Nort Ýestti shaqyrdy. Eýropalyq BAQ-tyń aıtýynsha, ártis saıası málimdemeler jasamaǵan.
Týrdyń kelesi núktesi Qazaqstan bolady. 14 tamyzda Kane Ýest Almatydaǵy Ortalyq stadıonda óner kórsetýi tıis. Buǵan deıin megapolıske konsertke arnalǵan 100 tonnadan astam tehnıkalyq jabdyq jetkiziletini habarlanǵan bolatyn. Almatyǵa barlyq sahnalyq qurylymdarmen, jaryqpen jáne dybyspen shamamen 15 fýra jolǵa shyǵady.