Qazaqstan Qara teńizdegi munaı tankerlerine jasalǵan shabýyldarǵa qatysty Halyqaralyq teńiz uıymymen (HTU) kelissóz júrgizdi, dep habarlaıdy infohub.kz.
Syrtqy ister mınıstrliginiń málimetinshe, Qazaqstannyń Ulybrıtanıadaǵy elshisi Álibek Baqaev HTU Bas hatshysy Arsenıo Domıngespen kezdesti. Kezdesý barysynda Qara teńizdegi ahýalǵa erekshe nazar aýdaryldy.
Álibek Baqaev qazaqstandyq munaıdy tasymaldaıtyn tankerlerdi qosa alǵanda, saýda kemeleriniń qaýipsizdigin qamtamasyz etýdiń mańyzdylyǵyn atap ótti. Ol Qazaqstannyń keme qatynasy úshin qaýipsiz jaǵdaılar jasaýǵa jáne eldiń syrtqy saýda múddeleri men halyqaralyq energetıkalyq qaýipsizdik úshin mańyzy zor teńiz joldarynyń turaqtylyǵyna múddeli ekenin jetkizdi.
Arsenıo Domınges Qazaqstannyń ustanymyn qoldap, azamattyq jáne saýda kemelerin qorǵaýdyń túbegeıli mańyzdylyǵyn atap ótti. Ol HTU keme qatynasy qaýipsizdigi qaǵıdattaryn saqtaý jáne azamattyq teńiz kóligin qorǵaý úshin dáıekti túrde áreket etetinine sendirdi.
Taraptar sondaı-aq Kaspı teńiziniń halyqaralyq kólik-logıstıkalyq tizbekterdiń mańyzdy býyny retindegi strategıalyq rólin talqylady. Transkaspı halyqaralyq kólik baǵytynyń teńiz bóligin damytý, Kaspı arqyly júk tasymaly kólemin ulǵaıtý jáne Aqtaý men Quryq porttaryn jańǵyrtý Ortalyq Azıa, Qytaı jáne Eýropa elderi arasyndaǵy saýda-ekonomıkalyq baılanystar úshin jańa múmkindikter týǵyzatyny atap ótildi.
HTU Bas hatshysy odan ári yntymaqtastyqtyń keń aýqymyn atap, uıymnyń Qazaqstanǵa járdem kórsetýge daıyn ekenin rastady.
Halyqaralyq teńiz uıymy (HTU) — keme qatynasynyń qaýipsizdigi men kúzeti, kemelerden teńiz ortasynyń lastanýyn boldyrmaý jáne halyqaralyq teńiz kóliginiń basqa da máseleleri salasyndaǵy halyqaralyq normalar men standarttardy ázirleıtin jáne jetildiretin BUU-nyń mamandandyrylǵan mekemesi. Qazaqstan 1994 jyldan beri HTU múshesi bolyp tabylady.