Qaraǵandyda Qazaqstannyń qusbegilik ańshylyq quramasynyń múshesi birneshe jyl boıy úıinde Qyzyl kitapqa engen 35 jyrtqysh qusty, sonyń ishinde ıtelgilerdi, búrkitterdi jáne lashyndardy zańsyz ustaǵan. Tintý kezinde Qarjylyq monıtorıń agenttiginiń qyzmetkerleri qustardy alyp, kúdikti qamaýǵa alyndy, dep habarlaıdy infohub.kz saıty.
Qarjylyq monıtorıń agenttiginiń málimetinshe, er adam 2017 jyly úıiniń aýmaǵynda zańsyz pıtomnık uıymdastyrǵan. Ol «Qusbegilik» federasıasyna múshe bolyp, ulttyq qusbegilik ańshylyq boıynsha Qazaqstan quramasyna kirgen.
Tergeý nusqasy boıynsha, kúdikti Instagram-da ulttyq ańshylyq, qustardy ustaý jáne emdeý týraly aıtyp otyrǵan. Áleýmettik jeli arqyly ol tabıǵı ortadan aýlanǵan sırek kezdesetin jyrtqyshtardy ákep beretin adamdarmen tanysqan.
«Turǵylyqty mekenjaıynda júrgizilgen tintý kezinde 35 jyrtqysh qus, onyń ishinde ıtelgiler, búrkitter jáne lashyndar tabylyp, alyndy. Atalǵan túrler Qyzyl kitapqa engizilgen jáne sırek kezdesetin, joıylyp ketý qaýpi tóngen janýarlar qataryna jatady. Kúdikti qamaýǵa alyndy. Sot sanksıasymen oǵan tıesili Toyota 4Runner kóligine tyıym salyndy», – dep atap ótti QMA-da.
Agenttikte sondaı-aq úkim zańdy kúshine engennen keıin qustardy jabaıy tabıǵatqa qaıta jiberý josparlanyp otyrǵanyn habarlady. Tergeýdiń basqa málimetterin vedomstvo jarıalamaıdy.
Buǵan deıin redaksıa ulttyq park qyzmetkerleriniń Qyzyl kitapqa engen qustardy shetelge kontrabandalaý úshin aýlaǵanyn habarlaǵan edi. Olardan 40-tan astam qus, bes atys qarýy, 200-ge jýyq oq-dári, sýyq jáne laqtyratyn qarýlar, sondaı-aq qustardy ustaýǵa jáne tasymaldaýǵa arnalǵan jabdyqtar alynǵan. Aldyn ala esepteýler boıynsha, memleketke keltirilgen zalal 120 mıllıon teńgeden asqan.