Qaraǵandyda sot úıinde 35 jyrtqysh qusty, onyń ishinde sırek kezdesetin túrlerdi zańsyz satyp alyp, ustaǵan er adamǵa úkim shyǵardy, dep habarlaıdy infohub.kz saıty.
İsti Qazybek bı aýdandyq soty qarady. Aıyptalýshyǵa Qazaqstan Qylmystyq kodeksiniń 339-babynyń 1-bóligi — janýarlar men qustardyń sırek kezdesetin túrlerin zańsyz satyp alý jáne saqtaý baby boıynsha aıyp taǵyldy.
Sot anyqtaǵandaı, 2017 jyly er adam Instagram-da tanat.falcons degen paraqsha ashyp, onda qus salý arqyly ulttyq ańshylyq týraly materıaldar jarıalap, olardy ustaý, kútý jáne emdeý tájirıbesimen bólisken.
2017 jyldan 2026 jyldyń 5 aqpanyna deıin ol tıisti ruqsatsyz belgisiz satýshylardan sırek kezdesetin qustardy satyp alǵan. Barlyǵy aıyptalýshydan 35 qus tárkilendi.
Sarapshylardyń qorytyndysy boıynsha, olardyń ishinde 31 baloban, bir lashyn, eki búrkit jáne bir qarshyǵa bolǵan.
Sotta er adam kinásin tolyq moıyndap, ókingenin bildirdi.
Prokýror aıyptalýshyǵa bir jyl bas bostandyǵyn shekteý jáne úsh jylǵa sırek kezdesetin janýarlar men qustarǵa qatysty qyzmetpen aınalysýǵa tyıym salýdy surady. Er adamnyń ózi jáne onyń advokaty amnıstıa qoldanýdy ótindi.
Sot jeńildetetin mán-jaılar retinde kináni tolyq moıyndaýdy, shynaıy ókinýdi, sondaı-aq tórt kámeletke tolmaǵan balanyń asyraýynda bolýyn eskerdi. Aýyrlatatyn mán-jaılar anyqtalǵan joq.
«Er adamǵa bir jyl alty aı bas bostandyǵyn shekteý jazasy taǵaıyndalyp, bir jylǵa sırek kezdesetin jáne joıylyp bara jatqan janýarlar túrlerine qatysty qyzmetpen aınalysý quqyǵynan aıyryldy. Sonymen qatar, „Qazaqstan Respýblıkasynyń jańa Konstıtýsıasynyń qabyldanýyna baılanysty amnıstıa týraly“ zańynyń negizinde er adam bas bostandyǵyn shekteý túrindegi negizgi jazadan bosatyldy», — dep habarlady sotta.
Úkim áli zańdy kúshine engen joq.
Buǵan deıin er adamnan tárkilengen qustar ýaqytsha Qaraǵandy haıýanattar baǵynda ustalyp, sot úkimi zańdy kúshine engennen keıin tabıǵı mekendeıtin ortaǵa jiberiletini habarlanǵan bolatyn.