44 mln teńge kólemindegi alaıaqtyq úshin sottalyp, izdeý jarıalanǵan qaraǵandylyq Almatyda bet-álpetti taný fýnksıasy bar beınebaqylaý júıesiniń arqasynda ustaldy, dep habarlaıdy infohub.kz.
37 jastaǵy Qaraǵandy turǵyny erekshe iri mólsherdegi alaıaqtyq úshin izdestirilip júrgen. Kúdikti jábirlenýshige 44 mln teńgeden astam materıaldyq zalal keltirgen. Sot úkimine sáıkes, er adam probasıalyq baqylaýda bolǵan, alaıda 2023 jyly turǵylyqty jerin ruqsatsyz tastap, belgisiz baǵytqa ketken.
Úsh jyl boıy ol quqyq qorǵaý organdarynan jasyrynǵanyna qaramastan, izdeý toqtatylmady. Jedel aqparat boıynsha, izdeýli júrgen adam Almatyda júrgeni belgili boldy. Polısıa qyzmetkerlerine ony ustaý úshin arnaıy jedel-izdestirý sharalaryn júrgizýdiń qajeti bolmady – sheshýshi sát onyń sýpermarketterdiń birine barýy boldy, onda ol qalalyq beınebaqylaý júıesiniń kamerasyna túsken.
Neırojelini qoldanatyn zamanaýı tehnologıalar onyń beınesin izdeýli júrgen adamdardyń derekqorymen salystyryp, jeke tulǵasyn dál anyqtady. Sıgnaldy alǵannan keıin jergilikti polısıa qyzmetkerleri qaraǵandylyqty jedel ustady. Jeke basy rastalǵan soń, ol Qaraǵandyǵa jetkizildi. Qazirgi ýaqytta er adam qamaýda otyr jáne sot sheshimin kútýde. Odan ári buryn sot úkimimen belgilengen probasıalyq baqylaýdyń kúshin joıý jáne bas bostandyǵynan aıyrý jazasyn taǵaıyndaý máselesi qaralatyn bolady.