Qaraǵandy oblysynda «Vavada» ınternet-kazınosy oıynshylarynyń aqshasyn qabyldap, shyǵaryp otyrǵan dropovodtar tobynyń qyzmeti toqtatyldy. Bul týraly infohub.kz saıty habarlaıdy.
Qarjylyq monıtorıń agenttiginiń málimetinshe, operasıany prokýratýranyń úılestirýimen Qarjylyq monıtorıń agenttiginiń Qaraǵandy oblysy boıynsha departamenti júrgizgen.
«Tergeý derekteri boıynsha, 2026 jyldyń qańtarynda sqema uıymdastyrýshylary ınternet-kazıno ókilderimen Qazaqstan aýmaǵynda aqsha qabyldaý jáne shyǵarý týraly kelisimge kelgen. Keıinnen topqa qatysýshylardyń biri toptyń qyzmetin úılestirip, kazıno ókilderimen baılanysyp otyrsa, ekinshisi dropperlerdi izdeýmen, olardyń bank shottaryna qoljetimdilikti qamtamasyz etýmen jáne operatorlardy irikteýmen aınalysqan», — delingen Qarjylyq monıtorıń agenttiginiń resmı Telegram-arnasynda.
Vedomstvonyń málimdeýinshe, Qaraǵandyda jalǵa alynǵan keńsede operatorlar táýlik boıy aýysymmen jumys istegen.
Qarjylyq monıtorıń agenttiginiń aqparaty boıynsha, sqemada barlyǵy 23 drop-shot paıdalanylyp, olar arqyly 415 mln teńgeden astam somaǵa operasıalar júrgizilgen.
Eki kúdiktige qatysty úıqamaq túrindegi bultartpaý sharasy qoldanyldy.
Sottyń sanksıasymen olardyń múlkine, onyń ishinde jeke úıge, eki jer telimine jáne Mercedes-Benz kóligine tutqyn salyndy.
Qylmystyq is sotqa jiberildi. QR QPK-niń 201-babyna sáıkes ózge aqparat jarıalaýǵa jatpaıdy.