Qaraǵandy – Suryptaý – Aqadyr temirjol bóliginde qamys órtenip, órtti tolyq sóndirýge shamamen alty saǵat qajet boldy, dep habarlaıdy infohub.kz saıty.
QTJ-nyń málimetinshe, ótip bara jatqan poıyzdyń mashınısi órtti saǵat 14:15-te baıqap, dereý Qaraǵandy – Suryptaý stansıasynyń kezekshisine habarlaǵan. Órt oshaǵy temirjol tóseminen alty metr jerde bolǵan, órt aýmaǵy 0,7 ga qurady.
Oqıǵa ornyna Qaraǵandy stansıasynyń órt sóndirý poıyzy men óńirdiń TJD qyzmetkerleri jiberildi. Sóndirýge 25 adam men bes birlik arnaıy tehnıka qatysty. Órtti sóndirýge 90 tonna sý jumsaldy.
Saǵat 17:04-te órt oqshaýlanyp, 19:58-de tolyq sóndirildi.
«Órt poıyzdardyń qozǵalysyna áser etpedi. Kidirister tirkelgen joq, zardap shekkender joq. Temirjol ınfraqurylymy, joldar, sıgnal berý, baılanys jáne elektrmen jabdyqtaý júıeleri de zaqymdanbady», — dep habarlady QTJ-da.
Órt sóndirý poıyzdary temirjolda táýlik boıy kezekshilik etip, órt shyqqan jaǵdaıda jedel jetýge daıyn, dep atap ótti kompanıada.
Aldyńǵy kúni Soltústik Qazaqstan jáne Qaraǵandy oblystaryndaǵy tabıǵı órtterdi sóndirýge poıyzdar jumyldyrylǵan bolatyn. Qurǵaq shóp pen butalardyń órti temirjol joldaryna tym jaqyndap, poıyzdar qozǵalysyna qaýip tóndirdi.