Qaraǵandy oblysynda 13 jastaǵy jasóspirim tórt jasar balanyń ómirin saqtap, erlik jasady. Oqıǵa tamyz aıynyń basynda Buqar jyraý aýdanyndaǵy Semizbuǵa kólinde bolǵan, dep habarlaıdy infohub.kz saıty.
Polisia.kz málimetinshe, bala úrlemeli matrasta júzip júrgen kezde qatty jel ony aýdaryp, kishkentaı bala sýǵa túsip ketken. Jaqyn jerde bolǵan toǵyzynshy synyp oqýshysy Nuraly Álhan sasyp qalmaı, dereý kómekke umtylyp, balany sýdan shyǵaryp alǵan.
Jasóspirimniń bul áreketi áleýmettik jelilerde taraǵan soń belgili boldy. Qaraǵandy oblysy polısıa departamentiniń bastyǵy Negmet Ismaǵulov Nuralyny anasymen birge qabyldap, jeke ózi alǵysyn bildirdi. «Men Nuralynyń áreketi týraly áleýmettik jelilerden bilip, onyń batyldyǵyna shyn júrekten tánti boldym. Syn saǵatta ol sasyp qalmaı, óz ómirin qaterge tigip, kishkentaı balanyń ómirin saqtap qaldy. Mundaı áreket qurmetke laıyq. Balanyń batyl ári meıirimdi bolyp óskeni úshin ata-anasyna jeke alǵys aıtqym keledi», — dedi polısıa bastyǵy.
Negmet Ismaǵulov rızashylyq belgisi retinde jasóspirimniń anasy Samal Ábdirahmanovaǵa alǵys hat tabys etti. Áıel alty bala tárbıelep otyr. «Ana retinde men balam úshin qatty ýaıymdadym. Onyń balany qutqarýǵa umtylǵanyn bilgende, ol úshin qoryqtym. Biraq balanyń aman qalǵanyn bilgen soń, úlken maqtanysh sezimi paıda boldy. Polısıa departamentiniń basshylyǵyna balamnyń áreketin atap ótkenderi úshin alǵys aıtamyn», — dedi Samal Ábdirahmanova.
Nuralydyń ózi sol sátte yqtımal saldary men marapat týraly oılamaǵanyn aıtady. Onyń aıtýynsha, ol jaı ǵana balanyń qaýipte ekenin kórip, kómektesýdi sheshken. «Bári kútpegen jerden boldy. Aldymen bala úrlemeli matrasta júzip júrdi, sodan keıin jeldiń saldarynan matras aýdarylyp, ol sýǵa tústi. Men dereý ony qutqarýǵa umtyldym. Meniń bes aǵa-inim men qaryndasym bar, sondyqtan sol sátte onyń ornyna óz týystarymdy elestettim. Men jaı ǵana balanyń tiri qalǵanyn qaladym. Eshqandaı marapat týraly oılaǵan joqpyn», — dedi Nuraly.
Kórsetken batyldyǵy men erligi úshin Nuraly Álhanǵa polısıa departamentiniń bastyǵy Qazaqstan Respýblıkasy İshki ister mınıstrliginiń rámizi bar qol saǵatyn tabys etti. Onyń aǵa-inileri men qaryndastaryna da syılyqtar berildi. Negmet Ismaǵulov jas batyrǵa oqýda tabys, myqty densaýlyq jáne jarqyn bolashaq tilep, onyń batyldyǵy, janashyrlyǵy men jaýapkershilik sezimi bolashaqta da laıyqty isterge negiz bolatynyna senim bildirdi.