Qazaqstandyq karateshi Nurqanat Ájikanov Japonıada ótip jatqan Azıa oıyndary-2026-da 75 kelige deıingi salmaqta úshinshi orynǵa kóterildi. Qola júlde úshin beldesýde ol fılıppındik Alvın Batıchandy 10:1 esebimen jeńip, qarsylasyna múmkindik qaldyrmady, dep habarlaıdy infohub.kz saıty.
25 jastaǵy sportshynyń júldege barar joly sátsizdikten bastaldy: shırek fınalda Ájikanov ırandyq Morteza Nematıge 0:8 esebimen jol berdi. Alaıda qarsylasy keıin fınalǵa shyǵyp, qazaqstandyqqa jubanysh toryna jol ashyp, qola úshin kúresýge múmkindik berdi.
Úshinshi oryn úshin sheshýshi beldesýde Ájikanov Batıchanmen kezdesip, aıqasty senimdi túrde jeńispen aıaqtady – 10:1.
Qazaqstandyq karateshi úshin bul Azıa oıyndaryndaǵy alǵashqy tabys emes: 2023 jyly Hanchjoýda ol 75 kelige deıingi salmaqta chempıon atanǵan. Onyń qorjynynda 2021 jylǵy álem chempıonatynyń eki qola medali bar – jeke jáne komandalyq kýmıtede. Sonymen qatar Ájikanov Azıanyń úsh dúrkin chempıony: 2021 jyly komandalyq kýmıtede jeńiske jetse, 2023 jáne 2025 jyldary 75 kelige deıingi salmaqta úzdik shyqty.
Osy tabystyń arqasynda Qazaqstan quramasynyń qorjynynda endi 11 medal bar: bes altyn, bir kúmis jáne bes qola.
Oıyndardyń resmı ashylýy 19 qyrkúıekte ótti. 45 eldiń sportshylary qatysatyn keshendi jarysta 460 medal jıyntyǵy sarapqa salynady: 217-si – erler arasynda, 204-i – áıelder arasynda jáne 39-y – aralas razrádtarda. Azıada-2026-da Qazaqstan quramasynyń sapynda 35 sport túrinen 558 sportshy óner kórsetýde.
Oıyndardyń birinshi kúni qazaqstandyqtar tórt altyn medal jeńip aldy. Chempıon atanǵandar: veloshabandozdar Rınata Sultanova men Alekseı Lýsenko, sondaı-aq karateshiler Jolaman Bıgabyl men Sofá Berýlseva. Sol kúni qurama qorjynyna besinshi altyndy MMA saıyskeri Erkinǵalı Búrkitalın saldy.
Jarystyń ekinshi kúninen keıin Qazaqstan beıresmı komandalyq esepte tórtinshi orynda tur.