«AK Altynalmas» AQ quramyndaǵy «Pýstynnoe» ken baıytý kombınaty aýmaǵynda 23 shildede saǵat 11:30 shamasynda ajalmen aıaqtalǵan oqys oqıǵa boldy, dep habarlaıdy infohub.kz saıty.
Kompanıada «Pýstynnoe» ken baıytý kombınatynyń KVD ZIF bóliminiń konveıer mashınısi Kárim Rymbaevtyń qaza tapqanyn habarlady.
«Oqıǵanyń sebepteri men mán-jaılaryn ýákiletti organdar anyqtap jatyr», — delingen kompanıanyń resmı habarlamasynda.
«AK Altynalmas» qaza tapqan adamnyń týystaryna, jaqyndaryna jáne áriptesterine kóńil aıtty.
«Kompanıa otbasyna barlyq qajetti kómek pen qoldaý kórsetedi», — dep atap ótti habarlamada.
Sondaı-aq kompanıa oqıǵa týraly tekserilmegen aqparatty taratpaýǵa shaqyrdy.
«Oqıǵanyń naqty mán-jaıyn burmalaıtyn jáne uıymnyń iskerlik bedeline nuqsan keltirýi múmkin anyq emes nemese tekserilmegen aqparatty taratý Qazaqstan Respýblıkasynyń zańnamasyna sáıkes jaýapkershilikke ákep soǵýy múmkin», — dep málimdedi «AK Altynalmas».
Kompanıa tek qana ýákiletti memlekettik organdar men kásiporynnyń baspasóz qyzmeti beretin resmı aqparatty basshylyqqa alýdy surady.