Qazaqstannyń Qarjy mınıstrligi respýblıkalyq búdjet jobasyna súıene otyryp, 2027-2029 jyldarǵa arnalǵan negizgi áleýmettik kórsetkishterdiń boljamyn usyndy. Qujatqa sáıkes, kórsetkishterdiń kópshiligi jyl saıyn 7-8,5%-ǵa ósedi, alaıda eń tómengi jalaqy ózgerissiz qalady... dep habarlaıdy infohub.kz saıty.
Atap aıtqanda, aılyq eseptik kórsetkish (AEK) 2027 jyly 4325 teńgeden 4693 teńgege deıin ósedi. 2028 jyly onyń 5022 teńgege, al 2029 jyly 5374 teńgege deıin artýy kútilýde, bul shamamen jyl saıyn 7% ósimdi quraıdy.
Eń tómengi kúnkóris deńgeıi de joǵarylaıdy: 2027 jyly ol 55 173 teńgeni quraıdy (qazir – 50 851 teńge), 2028 jyly – shamamen 59 myń teńge, al 2029 jyly – shamamen 63 myń teńge.
Boljam boıynsha, eń tómengi zeınetaqy 2027 jyly 74,9 myń teńgege deıin ósedi (qazir – 69 049 teńge), 2028 jyly – 80 myń teńgege, al 2029 jyly – 85,8 myń teńgege deıin jetedi. Bul somadan barlyq azamattarǵa búdjetten tólenetin eń tómengi bazalyq zeınetaqy: 2027 jyly – 38 622 teńgeni (qazir – 35 596 teńge), 2028 jyly – 41 325 teńgeni, 2029 jyly – 44 217 teńgeni quraıdy.
Ózgermeıtin jalǵyz kórsetkish – eń tómengi jalaqy (JMZ) – ol úsh jyl boıy 85 myń teńge deńgeıinde bekitiledi.
Buǵan deıin 2027-2029 jyldarǵa arnalǵan búdjet jobasyna sáıkes, Qazaqstanda 2027 jyly ortasha bazalyq zeınetaqy 59 myń teńgeni, al yntymaqty zeınetaqy – 111,6 myń teńgeni quraıtyny habarlanǵan bolatyn. Eske salaıyq, Qazaqstanda zeınetaqy búdjetten tólenetin bazalyq jáne yntymaqty tólemderden, sondaı-aq BJZQ-dan tólenetin tólemderden turady. Yntymaqty zeınetaqy 1998 jyldyń 1 qańtaryna deıin keminde alty aı eńbek ótili bar azamattarǵa taǵaıyndalady. Bazalyq jáne yntymaqty tólemder birge jıyntyq zeınetaqyny quraıdy.