Qazaqstan Qashaǵan munaı ken ornynyń operatory NCOC kompanıasy basshylyǵyna ekologıalyq aıyppuldy tólemegeni úshin ákimshilik jáne qylmystyq jaýapkershilikke tartylýy múmkin ekendigi týraly eskertti, dep habarlaıdy Reuters, - delingen infohub.kz aqparatynda.
Reuters dereginshe, respýblıka Ádilet mınıstrligi NCOC basqarýshy dırektory Djankarlo Rýıýǵa zań talaptaryn oryndamaǵany úshin jaýapkershilikke tartylýy múmkin ekendigi týraly resmı eskertý joldaǵan. Másele 2023 jyly kúkirt saqtaý kóleminiń ruqsat etilgen shekten asqany úshin eseptelgen 2,3 trıllıon teńge (shamamen 4,9 mıllıard dollar) kólemindegi aıyppulǵa qatysty.
Qashaǵan operatory talaptardy moıyndamaıdy. NCOC jáne konsorsıýmǵa qatysýshy kompanıalar (Shell, Eni, TotalEnergies, ExxonMobil) aıyppuldy negizsiz dep sanaıdy. Daý halyqaralyq tórelikte qaralýda. Kompanıalar is aıaqtalmaıynsha óndirip alý júzege aspaýy kerek ekenin alǵa tartady.
Ótken aptada Ádilet mınıstrligi operatordyń aıyppuldy dúısenbige deıin erikti túrde tóleı alatynyn, áıtpese májbúrlep óndirip alý rásimi bastalyp, qaryz somasyna 10% qosymsha alym salynatynyn habarlady.
Kúkirt – munaı óndirý men daıyndaýdyń qosalqy ónimi. Qashaǵan táýligine shamamen 430-450 myń barel munaı óndiredi, bul Qazaqstandaǵy kólemi boıynsha ekinshi ken orny. Buǵan deıin BUU-nyń UNCITRAL tóreligi NCOC-tan aıyppuldy májbúrlep óndirip alý múmkindigin shektegen bolatyn.
NCOC-tiń aksıonerleri: KMG Kashagan B.V. (16,877%), Shell Kazakhstan Development B.V. (16,807%), Total EP Kazakhstan (16,807%), Agip Caspian Sea B.V. (16,807%), ExxonMobil Kazakhstan Inc. (16,807%), CNPC Kazakhstan B.V. (8,333%) jáne Inpex North Caspian Sea Ltd. (7,563%).