Qaskeleńdegi perzenthanada shala týǵan úshem sábıler qaıtys boldy. Marqum nárestelerdiń týystary kinálilerdi jaýapqa tartýdy talap etip otyr, dep habarlaıdy infohub.kz.
28 jastaǵy áıel júktiliktiń altynshy aıynda úsh ul týǵan. Týystardyń aıtýynsha, eki sábı týǵannan keıin birden kóz jumsa, úshinshisiniń ólimi týraly ákesi kezdeısoq bilgen. Qaıǵydan qan jutqan ata-ana endi ulynyń denesin berýdi surap, muqıat tergeý júrgizýdi talap etip otyr.
Týystar bosanýshyǵa kesar tiligin usynǵanyn, alaıda dárigerler tabıǵı bosanýǵa májbúrlegenin aıtady. «Bizge kesar tiligi jasalýy kerek dedi. Biraq nege ekenin bilmeımiz, Aıdanany óz betimen bosanýǵa májbúrledi. Tańerteń onyń ózi kúıeýine eki balanyń ólgenin jazdy. Al úshinshisin dárigerler bólimshede dedi. Biz eki náresteni jerleýge kettik. Keıin úshinshisiniń de qaıtys bolǵanyn bildik. Nege dárigerler bul týraly bizden jasyrdy?» — dedi týys Jazıra Túleshova.
Olar sondaı-aq balalardyń ólim sebebin aıtpaǵanyn málimdeıdi. «Bizge eshqandaı qujatsyz eki balany jáshikke salyp berdi. Meniń ózime túski saǵat ekiniń jarymynda eki náresteni qorapqa salyp ustatty. Biz munyń bári qalaı bolǵanyn, balalarymyzdy qalaı joǵaltqanymyzdy bilgimiz keledi. Ne boldy? Biz eksgýmasıa jasap, úsh balanyń da DNQ-syn rastaýdy talap etemiz», — dedi týys Erjan Ekeıbaev.
Dárigerler ózderiniń hattama boıynsha áreket etkenin aıtady. Olardyń aıtýynsha, bosanýshy shuǵyl túrde aýrýhanaǵa jatqyzylǵan. Úsh náreste tótenshe tómen salmaqpen dúnıege kelgen — olardyń músheleri tolyq jetilmegen. «25 aptalyq merzimdegi úshemmen bosaný — asa aýyr jaǵdaı jáne shuǵyl gospıtalızasıany talap etedi. Týǵan kezde salmaǵy 500 gramnan az bolsa, bul tótenshe tómen salmaq sanalady, bul kezde ómirlik mańyzdy músheler, ásirese ókpe men ortalyq júıke júıesi áli tolyq qalyptaspaǵan», — delingen Qarasaı aýdandyq klınıkalyq kópsalaly ortalyq aýrýhanasynyń baspasóz qyzmetiniń habarlamasynda.
Endi qaıǵyǵa batqan ata-ana úshinshi balanyń denesin berýdi kútip otyr. Týystar polısıaǵa aryzdanǵan — olar apatqa kinálilerdiń jazalanýyn qalaıdy.