Qaskeleńdegi perzenthanada úshem nárestelerdiń óliminen keıin otbasy dárigerlerdiń áreketin tekserýdi talap etip, polısıaǵa aryzdandy. Medıkter hattamaǵa sáıkes áreket etkenderin aıtady, dep habarlaıdy infohub.kz saıty.
28 jastaǵy Aıdana Orazbaeva júktiliktiń altynshy aıynda úsh ul týǵan. Eki balanyń ólimi týraly oǵan dereý habarlandy. Keıin otbasy úshinshi náresteniń de qaıtys bolǵanyn bildi. Áıel úshin bul úshinshi júktilik edi, ol kúıeýimen birge eki bala tárbıelep otyr. Sońǵy aıynda ol aýrýhanada saqtaýda jatqan. Bosaný kúni ol úıge az ýaqytqa suranyp ketken, sodan keıin sýy ketken.
Aıdanaǵa kesar tiligin usyndy, alaıda bosaný tabıǵı jolmen qabyldandy. Týysy Jazıra Tóleshova: «Bizge kesar jasalýy kerek edi dedi. Biraq nege ekenine Aıdanany bosandyryp tastady. Tańerteń ol kúıeýine eki bala óldi dep ózi jazdy. Al úshinshisi, dárigerlerdiń aıtýynsha, bólimshede jatyr. Biz eki sábıdi jerleýge kettik. Keıin úshinshisi de ólgenin bildik. Nege dárigerler bizden jasyrdy?» – dedi.
Jaqyndarynyń aıtýynsha, olarǵa tek eki náresteniń denesi berilgen, ólim sebepteri belgisiz. Qazir olar úshinshi balanyń denesin alýdy kútip otyr. Otbasy polısıaǵa aryzben júginip, barlyq balalarǵa sot-medısınalyq saraptama men DNK zertteý júrgizýdi talap etedi.
Aýrýhanada áıeldi shuǵyl túrde gospıtalızasıalaǵanyn, al úsh náresteniń barlyǵy 25 aptalyq merzimde dene salmaǵy óte tómen – 500 gramnan az bolyp týylǵanyn málimdedi. Medıkterdiń aıtýynsha, mundaı merzimde ókpe men ortalyq júıke júıesin qosa alǵanda, ómirlik mańyzdy organdar tolyq qalyptaspaǵan. Mekemede dárigerler hattamaǵa qatań sáıkes áreket etkenin atap ótti. Nárestelerdiń óliminiń naqty sebebin sot-medısınalyq saraptama anyqtaıdy.
Buǵan deıin Almaty oblysynda jańa týǵan náreste birneshe kúnnen keıin qaıtys bolǵan. Aýrýhanada tekserý bastaldy.