Mańǵystaý oblysynda Kaspı teńiziniń akvatorıasynda aýqymdy izdestirý-qutqarý operasıasy táýlik boıy úzdiksiz júrgizilýde — aýa raıynyń kenetten nasharlaýynan keıin habar-osharsyz ketken eki áskerı qyzmetshi izdestirilýde, dep habarlaıdy infohub.kz saıty.
Qorǵanys mınıstrliginiń resmı Telegram-arnasynda málim etkendeı, jumystar Qazaqstan Respýblıkasy Premer-mınıstriniń orynbasary Qanat Bozymbaev basqaratyn Úkimettik komısıanyń tapsyrmasymen atqarylýda.
İzdestirý-qutqarý jumystaryn jedel basqarýdy Qorǵanys mınıstri, avıasıa general-leıtenanty Dáýren Qosanov júzege asyrýda. Qurylǵan jedel shtabtyń quramyna Qorǵanys mınıstrliginiń, UQK Shekara qyzmetiniń, Tótenshe jaǵdaılar mınıstrliginiń, İshki ister mınıstrliginiń, sondaı-aq Mańǵystaý oblysynyń jergilikti atqarýshy organdarynyń ókilderi kirdi.
«Aýqymdy izdestirý-qutqarý operasıasyna 252 adam jeke quram, 34 birlik arnaıy jerústi tehnıkasy, 37 áskerı súńgýir, 14 keme men qaıyq, sondaı-aq 4 tikushaqty qosa alǵanda 20-dan astam áýe kemesi jumyldyryldy. Vedomstvolardyń kúshteri men quraldarymen sý akvatorıasyn, jaǵalaý aımaǵyn jáne irgeles aýmaqtardy áýeden úzdiksiz patrúldeý men tekserý júrgizilýde», — dedi Qorǵanys mınıstrliginde.
Oqıǵa faktisi boıynsha qylmystyq is qozǵalyp, arnaıy komısıa bolǵan jaǵdaıdyń barlyq sebepteri men mán-jaılaryn anyqtaý úshin tergeý sharalaryn júrgizýde.
Qaza tapqandardyń otbasylaryna jáne zardap shekken áskerı qyzmetshilerge qajetti materıaldyq jáne psıhologıalyq kómek kórsetiledi.
Eske salaıyq, oqý-jaýyngerlik tapsyrmany oryndaý barysynda aýa raıynyń kenetten jáne kúrt nasharlaýy men ekpindi jelden 17 áskerı qyzmetshi ashyq teńizge aǵyzylyp ketken bolatyn. Jedel qabyldanǵan sharalardyń nátıjesinde úsh áskerı qyzmetshi qutqarylyp, ekeýin izdeý jalǵasýda. Ókinishke qaraı, 12 áskerı qyzmetshi qaza tapty. Búgin Qazaqstanda Jalpyulttyq aza tutý kúni.