Kaspı teńizindegi oqý-jattyǵý kezinde Mańǵystaý oblysynda qaza tapqan sarbazdardyń qyzmet etýine nebári 8 kún qalǵan — úıge bıletteri satyp alynǵan bolatyn. Bul týraly Áskerı-teńiz kúshteri bas qolbasshysynyń orynbasary Arman Satqanov aıtty, dep habarlaıdy infohub.kz saıty.
Onyń aıtýynsha, qaza tapqandar áskerı-teńiz bazasynyń teńiz jaıaý áskeriniń desanttyq-shabýyldaý batalóny quramynda qyzmet etip, jaqsy nátıje kórsetken. Tragedıa aldynda áskerıler eki ret jattyǵý ótkizgen, olardyń barlyǵy túsirý tártibin bilgen.
«Jigitter áskerı-teńiz bazasynyń teńiz jaıaý áskeriniń desanttyq-shabýyldaý batalóny quramynda jaqsy qyzmet etti. Buǵan deıin eki jattyǵý ótkizildi, jigitter túsirý týraly bárin bildi. Bul búkil Qazaqstan boıynsha ótken iri qorytyndy strategıalyq komandalyq-shtabtyq oqý-jattyǵýlar edi. Epızodtardyń biri — teńiz desantyn jaǵaǵa túsirý. Biraq túsirý kúni tolqyn kóterilip, olardy túsirý kezinde basyp qaldy», — dep keltiredi Arman Satqanovtyń sózin «Moı gorod» basylymy.
Áskerı-teńiz kúshteri bas qolbasshysynyń orynbasary oqıǵaǵa qatysy barlardyń barlyǵy qazir jaýap berip jatqanyn qosty. Mınıstrlik tarapynan qaza tapqandardyń týystaryna psıhologıalyq jáne qarjylyq kómek kórsetilýde.
Eske salaıyq, 24 qyrkúıekte oqý-jaýyngerlik tapsyrmany oryndaý kezinde aýa raıynyń kenetten jáne kúrt nasharlaýy men ekpindi jelden Kaspı teńizine 17 áskerı qyzmetshini alyp ketti. Olardyń on tórti qaza tapty.
Úsh áskerı qutqaryldy, bireýi aýrýhanaǵa jatqyzyldy. Keshe oblystyq densaýlyq saqtaý basqarmasy pasıent Mańǵystaý oblystyq kópbeıindi aýrýhanasyna jetkizilgenin, onyń jaǵdaıy turaqty aýyr dep baǵalanǵanyn habarlady.
Aman qalǵandardyń arasynda Atyraý oblysynyń 19 jastaǵy Beket Qýandyq bar.