Mańǵystaý oblysynyń Túpqaraǵan aýdanynda Tótenshe jaǵdaılar mınıstrliginiń qyzmetkerleri Kaspı teńiziniń jaǵalaýynda qutqarý operasıasyn júrgizdi. Aýa raıynyń kúrt nasharlaýynan adamdar mingen úrlemeli qaıyq jaǵadan alystap ketti, dep habarlaıdy infohub.kz saıty.
Oqıǵa ótken túni boldy. Rezınaly qaıyqta úsh adam bolǵan. Kúshti ekpindi jel olardyń jaǵaǵa jetý jolyn kesip, qaıyqty ashyq teńizge alyp ketti. Joǵalǵandardy izdeýge qutqarý bólimsheleri dereý attandy.
Vedomstvo qyzmetkerleri aǵyzylǵan qaıyqty jedel taýyp, barlyq jolaýshylardy aman-esen jaǵaǵa jetkizdi. Qutqarylǵandar medısınalyq kómekke muqtaj bolmady. Mamandar azamattarǵa sýdaǵy qaýipsizdik erejelerin saqtaý qajettigin taǵy da eske saldy. Jel kúsheıgen kezde teńizge shyǵýǵa qatań tyıym salynady.
Eske salaıyq, 24 qyrkúıekte Áskerı-teńiz kúshteriniń oqý-jattyǵýy kezinde Kaspı teńiziniń jaǵalaýynda aýa raıy nasharlap, jel kúsheıdi. Sonyń saldarynan áskerı qyzmetshiler toby teńizge aǵyzyldy. Mańǵystaý oblysy ákimdiginiń naqtylanǵan derekteri boıynsha, sýǵa 17 adam túsken. Olardyń 14-i qaza tapty. Oqıǵa ornynda vıse-premer Qanat Bozymbaev bastaǵan úkimettik komısıa jumys isteýde. Ol izdeý jumystaryn táýlik boıy júrgizýdi jáne qaza tapqandardyń otbasylaryna qajetti kómek kórsetýdi tapsyrdy. Oqıǵanyń sebepteri men mán-jaıy qylmystyq is aıasynda anyqtalýda.
Prezıdent Qasym-Jomart Toqaev 25 qyrkúıekti qaza tapqan áskerı qyzmetshilerdi eske alý kúni — jalpyulttyq aza tutý kúni dep jarıalaǵan bolatyn.