Mańǵystaý oblysynda áskerı qyzmetshilerdiń ómirin jalmaǵan tótenshe oqıǵanyń sebepterin tergeý jáne saldaryn joıý máselelerine arnalǵan úkimettik komısıanyń kezekti otyrysy Aqtaýda ótti. Qazaqstan Respýblıkasy İshki ister mınıstriniń orynbasary Sanjar Ádilov komısıa tóraǵasy Qanat Bozymbaevqa sotqa deıingi tergeý barysy týraly baıandady, dep habarlaıdy infohub.kz saıty.
Sanjar Ádilovtiń aıtýynsha, qylmystyq is aıasynda kúdiktiler mártebesi prosestik turǵydan tirkelip, Aqtaý qalasynyń ýaqytsha ustaý ızolátoryna bes laýazymdy tulǵa qamaldy: shtab bastyǵy — Qazaqstan Respýblıkasy Qarýly Kúshteri Áskerı-teńiz kúshteri bas qolbasshysynyń birinshi orynbasary, eki áskerı bólim komandıri, teńiz jaıaý áskeri rotasynyń komandıri jáne kater komandıri.
«Tergeý jáne prosestik is-sharalar tolyq kólemde jalǵasýda, qajetti saraptamalar júrgizilýde. Tergeý barysynda barlyq qatysy bar adamdardyń áreketterine qatań quqyqtyq baǵa berilip, kúdiktilerdiń tolyq sheńberi túpkilikti anyqtalatyn bolady», — dedi ishki ister mınıstriniń orynbasary.
Qanat Bozymbaev zańmen kepildendirilgen tólemderdiń kidirissiz júrgiziletinin, ár otbasyna turaqty nysanaly qoldaý kórsetý úshin jaýapty mamandar bekitiletinin atap ótti.
Ol sondaı-aq qazaqstandyqtardyń azamattyq bastamasynyń arqasynda qarajat jınaý aıaqtalǵanyn málimdedi. Qaza tapqandardyń otbasylary men zardap shekkenderge qor qarajatyn ádil bólý úshin Qazaqstan Halyq Keńesiniń múshesi, Mańǵystaý oblysy qoǵamdyq keńesiniń tóraǵasy Bekmurat Júsipov basqaratyn arnaıy komısıa quryldy.
Eske salaıyq, 24 qyrkúıekte oqý-jaýyngerlik tapsyrmany oryndaý barysynda aýa raıynyń kenetten kúrt nasharlaýy men ekpindi jeldiń saldarynan Kaspı teńizine 17 áskerı qyzmetshi aǵyp ketip, olardyń 14-i qaza tapty. Úsheýi qutqaryldy.
Qylmystyq is Qazaqstan Respýblıkasy Qylmystyq kodeksiniń eki baby boıynsha qozǵaldy. Qazirgi tańda Qorǵanys mınıstrliginiń joǵary qolbasshylyq quramyndaǵy bes laýazymdy tulǵanyń ustalǵany belgili. Búgin qorǵanys mınıstri kináliler zańnyń barlyq qatańdyǵymen jazalanatynyn ýáde etti.