Mańǵystaý oblysyndaǵy oqý-jattyǵý kezinde áskerılerdiń qaza tabýyna qatysty tergeý jalǵasyp jatyr. Tergeý naqty tulǵalarǵa aýysty: qyzmetke nemquraıly qarady dep kúdiktelgen laýazymdy adamdar anyqtaldy. Bul týraly infohub.kz saıty habarlaıdy.
Qazaqstan Bas prokýratýrasy óziniń resmı Telegram-arnasynda habarlaǵandaı, is boıynsha oqıǵa orny qaralyp, 30-dan astam áskerı jaýapqa tartyldy, qujattama men beınematerıaldar alyndy. Sonymen qatar 12 saraptama taǵaıyndaldy.
«Qyzmetke nemquraıly qarady dep kúdiktelgen, sondaı-aq meteojaǵdaıdy eskere otyryp, jeke quramnyń qaýipsizdigin qamtamasyz etý úshin baqylaýdy jáne qajetti sharalardy qoldanýdy qamtamasyz etpegen, qutqarý jumystaryn tıisti deńgeıde uıymdastyrmaǵan, saldarynan adamdardyń qaza tabýyna ákep soqqan laýazymdy adamdar anyqtaldy», — delingen Bas prokýratýra málimdemesinde.
Vedomstvo tergeý barlyq kúdiktilerge tolyq quqyqtyq baǵa berip, prosestik sharalar qoldanatynyn atap ótti.
Eske salaıyq, 24 qyrkúıekte oqý-jaýyngerlik mindetti oryndaý barysynda meteorologıalyq jaǵdaıdyń kenetten jáne kúrt nasharlaýy men ekpindi jeldiń saldarynan Kaspı teńizine 17 áskerıdi aǵyzyp áketti. Úsheýi qutqaryldy, 12-si qaza tapty, ekeýin izdeý jalǵasýda. Qazaqstan Respýblıkasy Qylmystyq kodeksiniń eki baby boıynsha qylmystyq is qozǵaldy.
Búgin Qazaqstanda — Jalpyulttyq aza tutý kúni.