Kaspı teńizinde 14 áskerı qyzmetshi qaza tapqan oqıǵadan keıin Qazaqstanda bes joǵary shendi áskerı qyzmetker ustaldy. Olardyń qatarynda Áskerı-teńiz kúshteri Bas shtabynyń bastyǵy ári birinshi orynbasary, eki áskerı bólim komandıri, sondaı-aq teńiz jaıaý áskeri rotasynyń jáne keme komandıri bar. Olar qylmystyq nemquraılylyq jasady dep kúdikke ilingen, dep habarlaıdy infohub.kz saıty.
Beısenbi kúni 17 áskerı qyzmetshi kemeden túsip jatqanda teńizge aǵyzyp áketken. Olardyń 14-i qaza tapty, úsheýi qutqaryldy. Resmı málimet boıynsha, oqıǵa «meteorologıalyq jaǵdaıdyń kúrt nasharlaýy men jeldiń kúsheıýi saldarynan jaýyngerlik oqý-jattyǵý mindetin oryndaý barysynda» bolǵan.
Oqıǵa Aqtaý qalasynan shamamen 43 shaqyrym jerde oryn aldy. Tergeý júrgizý úshin İshki ister mınıstrliginiń komıteti quryldy. İshki ister vıse-mınıstri Sanjar Ádilovtiń aıtýynsha, qaza tapqandar boıynsha sotqa deıingi tergeý júrgizilýde.
Tergeý áskerı oqý-jattyǵýdy uıymdastyrý men ótkizý kezinde qabyldanǵan sheshimderdi, qaýipsizdik talaptarynyń saqtalýyn jáne aýa raıy jaǵdaıynyń eskerilýin, sondaı-aq kemeniń tehnıkalyq sıpattamalaryn zerdeleıdi.
Qazaqstan Qorǵanys mınıstrliginiń málimetinshe, «Kaspı qorǵanysy – 2026» áskerı oqý-jattyǵýyna 500-den astam áskerı qyzmetshi, áskerı kemeler men jaǵalaý bólimsheleri qatysqan.