Kaspı teńizindegi qaıǵyly oqıǵadan aman qalǵan áskerı qyzmetshi Nıkıta Ýdalovtyń týystary resmı málimdeme jasady. Jas jigit basynan ótkendi ázirge jarıa túrde aıtýǵa daıyn emes, dep habarlaıdy infohub.kz saıty.
Málimdeme mátini Nıkıta Ýdalovtyń aǵasynyń Instagram áleýmettik jelisindegi paraqshasynda jarıalandy. Úndeýde týystary rastalmaǵan aqparattyń taralýyn toqtatýdy surap, áskerı qyzmetshiniń jýrnalısermen nege baılanyspaıtynyn túsindirdi.
«Nıkıta ózin ózi qutqaryp qaldy. Qaıǵyly sátte ol baǵdarlaı bilip, jaǵaǵa jetip, aman qaldy. Qazir kópshilik onyń buny qalaı istegenin jáne naqty ne bolǵanyn surap jatyr. Biraq ol ázirge bul týraly aıtýǵa daıyn emes. Biz buǵan túsinistikpen qaraýdy suraımyz. Ol bir kúnde umytylmaıtyn nárseni basynan ótkerdi. Qazir ol jarıalylyqty qalamaıdy, suhbat bergisi kelmeıdi jáne egjeı-tegjeıin aıtýǵa daıyn emes. Biz muny qurmetteýdi óte suraımyz», — delingen málimdemede.
Eske salaıyq, 24 qyrkúıekte oqý-jaýyngerlik tapsyrmany oryndaý barysynda aýa raıynyń kenetten kúrt nasharlaýy men ekpindi jeldiń saldarynan Kaspı teńizine 17 áskerı qyzmetshi aǵyzylyp ketti. Olardyń on tórteýi qaza tapty.
Buǵan deıin memleket basshysy Qasym-Jomart Toqaev Nıkıta Ýdalov pen aman qalǵan taǵy eki áskerı qyzmetshini «Erligi úshin» medalimen marapattaǵan bolatyn.
Sonymen qatar Qazaqstannyń qorǵanys vedomstvosy basshylyǵynda kadrlyq ózgerister boldy. Dáýren Qosanov qorǵanys mınıstri qyzmetinen bosatyldy. Onyń ornyna Aıdos Myrzahmetov taǵaıyndaldy.