Mańǵystaý oblysyndaǵy áskerı oqý-jattyǵý kezinde habarsyz ketken taǵy eki áskerı qyzmetshiniń denesi Kaspı teńizinen tabyldy. Aqparatty Qorǵanys mınıstrligi rastady, dep habarlaıdy infohub.kz saıty.
İzdeý-qutqarý jumystary túni boıy toqtaǵan joq. Osylaısha, oqıǵa saldarynan qaza tapqandar sany 14 adamǵa jetti. İzdeý operasıasy aıaqtaldy.
«Búgin, 25 qyrkúıekte, saǵat 09:15 shamasynda úzdiksiz izdeý-qutqarý jumystary barysynda buryn habarsyz ketken eki áskerı qyzmetshiniń — serjant Gýmarov Mansurdyń jáne matros Turdybekuly Mırastyń denesi tabyldy», — delingen habarlamada.
Mańǵystaý oblysynda Kaspı teńizinde qaza tapqan áskerı qyzmetshilerdiń otbasylaryna kómek jınaý úshin biryńǵaı operator aıqyndaldy. Ol «Ulttyq rýh» qoǵamdyq birlestigi boldy.
Ákimdikte túsindirgendeı, biryńǵaı tetik qaza tapqandardyń otbasylaryna kómektesýge nıet bildirýshilerdiń kóptigine baılanysty jáne alaıaqtyqtyń aldyn alý úshin quryldy. Jınalǵan qarajat tek áskerı qyzmetshilerdiń otbasylaryna jiberiledi, onyń jumsalýyn memlekettik jáne quqyq qorǵaý organdary baqylaıdy.
Turǵyndardy aqshany jeke kartalarǵa jáne belgisiz shottarǵa aýdarmaýǵa shaqyrdy.
Resmı derektemeler:
«Ulttyq rýh» qoǵamdyq birlestigi
BSN: 090140013447
Bank: «Alatau City Bank» AQ
BSK: TSESKZKA
JSK: KZ03998PTB0000488655
Valúta: KZT
Qaıǵyly oqıǵa 24 qyrkúıekte Kaspıdegi Áskerı-teńiz kúshteriniń oqý-jaýyngerlik tapsyrmalaryn oryndaý kezinde boldy. Kenetten bastalǵan daýyl men ekpindi jelden 17 áskerı qyzmetshi ashyq teńizge aǵyzylyp ketti.
Oqıǵa saldarynan 12 adam qaza tapty, úsheýin qutqarý múmkin boldy (bireýi aýrýhanaǵa jatqyzyldy), taǵy ekeýin izdeý jalǵasýda.
Tótenshe jaǵdaıdyń sebepterin anyqtaý úshin Premer-mınıstr orynbasary Qanat Bozymbaev basqaratyn úkimettik komısıa quryldy. Nemquraılylyq jáne keme júrgizý erejelerin buzý baptary boıynsha qozǵalǵan qylmystyq is Bas prokýratýranyń erekshe baqylaýynda.
Sarbazdardyń qaza tabýyna baılanysty prezıdent Qasym-Jomart Toqaev 25 qyrkúıekti Qazaqstanda jalpyulttyq aza tutý kúni dep jarıalady.
Buǵan deıin «Kýrsıv» Kaspı teńizinde áskerı qyzmetshilerdi izdeý jalǵasyp jatqanyn jazǵan. Operasıaǵa júzdegen adam men ondaǵan arnaıy tehnıka jumyldyryldy.
Bas prokýratýra 30 áskerı qyzmetshiden jaýap alyp, kúdiktiler sheńberin anyqtaǵanyn habarlady.