Mańǵystaý oblysyndaǵy oqý-jattyǵý kezindegi qaıǵyly oqıǵadan aman qalǵan áskerı qyzmetshi oblystyq kópbeıindi aýrýhanaǵa jetkizilip, dárigerlerdiń turaqty baqylaýynda jatyr. Bul týraly óńirlik densaýlyq saqtaý basqarmasy habarlady, dep jazady infohub.kz saıty.
«Naýqasqa qajetti medısınalyq kómektiń barlyǵy tolyq kólemde kórsetilýde. Áskerı qyzmetshiniń jaǵdaıy qazirgi tańda aýyr kúıde turaqty dep baǵalanyp otyr», — delingen basqarma habarlamasynda.
Dárigerler emdeýdi jalǵastyryp, naýqastyń jaǵdaıyn qadaǵalap otyr. Ahýal oblystyq densaýlyq saqtaý basqarmasynyń baqylaýynda.
Eske salaıyq, 24 qyrkúıekte Áskerı-teńiz kúshteriniń áskerı qyzmetshileri Kaspı teńiziniń jaǵalaýynda oqý-jaýyngerlik mindetin oryndaǵan bolatyn. Qorǵanys mınıstrliginiń dereginshe, aýa raıy kúrt nasharlap, jel kúsheıgen. Teńizge 19 adamdy aǵyzyp áketken. Toǵyz áskerı qyzmetshi qaza tapty, úsheýin aman alyp qalýǵa múmkindik boldy. Qalǵandaryn izdeý jalǵasýda.
Áskerılerdiń qaza bolýyna qatysty qylmystyq is qozǵaldy, tergeý barysyn Bas prokýratýra erekshe baqylaýǵa aldy.
Prezıdent Qasym-Jomart Toqaev áskerı qyzmetshilerdiń týǵan-týystaryna kóńil aıtyp, 25 qyrkúıekti jalpyulttyq aza tutý kúni dep jarıalady.
Buǵan deıin «Kýrsıv» vıse-premer Qanat Bozymbaev basqarǵan úkimettik komısıanyń vedomstvolar jumysyn úılestirý jáne qaza tapqandardyń otbasylaryna kómek kórsetý úshin óńirge kelgenin habarlaǵan edi.