Mıchıgan shtatyndaǵy bes jasar balanyń gıperbarıalyq ottegi kamerasynda bolǵan órtten qaza tabýyna baılanysty burynǵy qaýipsizdik menedjeri 19 aıǵa bas bostandyǵynan aıyryldy. Bul týraly infohub.kz saıty habarlaıdy.
66 jastaǵy Djeffrı Mosteller Oklend okrýginiń sotynda óz kinásin moıyndamaı, abaısyzda adam ólimine ákep soqqan is boıynsha úkimdi tyńdady. Ol Oksford ortalyǵynda qaýipsizdik menedjeri bolyp jumys istegen. Bul mekeme aýtızm, SDVG jáne aýtoımmýndy aýrýlardy qosa alǵanda, túrli densaýlyq problemalary bar balalardy gıperbarıalyq ottegi terapıasymen emdeıtin balama medısına ortalyǵy.
Mostellerge 15 jylǵa deıin bas bostandyǵynan aıyrý jazasy qaýip tóngen edi, alaıda sot ony 19 aıǵa qysqartty. Oqıǵa 2025 jyldyń qańtarynda Detroıt qalasynyń mańyndaǵy Troı qalasyndaǵy Oksford ortalyǵynda bolǵan. Bes jasar Tomas Kýper zeıin tapshylyǵy gıperaktıvtiliginiń buzylýy (SDVG) jáne uıqy apnoesyna baılanysty em qabyldap jatqan. Kenetten kamera ishinde órt shyǵyp, jarylys bolǵan. Sarapshylardyń aıtýynsha, bala matrastaǵy paraqty tartyp, statıkalyq elektr ushqynyn týdyrǵan. Ottegige qanyqqan ortada bul ushqyn jalynǵa aınalyp, bala birneshe sekýnd ishinde qaza tapqan. Anasy kamerany ashýǵa tyrysyp, qoly men keýdesin qatty kúıdirip alǵan.
Mosteller Tomastyń ólimine baılanysty aıyptalǵan tórt burynǵy qyzmetkerdiń biri ǵana. Qalǵan úsheýiniń isi sotta qaralýda. Ortalyqtyń negizin qalaýshy jáne bas dırektory Tamela Peterson ekinshi dárejeli kisi óltirýge, nysan menedjeri Garı Marken ekinshi dárejeli kisi óltirýge jáne abaısyzda kisi óltirýge, al kamerany basqarǵan Aleta Moffıt abaısyzda kisi óltirýge jáne medısınalyq qujattarǵa jalǵan aqparat engizýge aıyptalǵan.
AQSH-tyń azyq-túlik jáne dári-dármek basqarmasy (FDA) gıperbarıalyq kameralardy keıbir aýrýlardy emdeýge qaýipsiz ári tıimdi dep tanyǵanymen, bul terapıa qaýipsizdigine qatysty daýlar órship tur. Tramp ákimshiliginiń densaýlyq saqtaý hatshysy Robert Kennedı kishiniń jaqtastary HBOT-ty qoldasa, kóptegen sarapshylar bul ádistiń medısınada keńinen qoldanylýyna kúmánmen qaraıdy. Tomastyń ata-anasy qaıtys bolǵan uly úshin klınıka men kamera óndirýshisine qarsy 100 mıllıon dollarlyq talap qoıǵan.