Aqtóbelik áıel ulynyń Gresıada 125 jylǵa bas bostandyǵynan aıyrylǵanyn habarlady. Qazaqstan Syrtqy ister mınıstrligi bul jaǵdaıǵa qatysty pikir bildirdi, dep habarlaıdy infohub.kz.
Aktobe times basylymynyń málimetinshe, redaksıaǵa jergilikti turǵyn Nurhan Qadyrova júgingen. Ol 24 jastaǵy uly Rashıd Qadırovtyń Túrkıadaǵy jumys týraly habarlandyrýǵa jaýap bergenin, biraq sonyń ornyna uzaq merzimge túrmege qamalǵanyn aıtty.
«Rashıd — meniń ortanshy ulym. Ol zattaryn jınap, eshkimge eshteńe aıtpaı ketti. Keıin maǵan onyń jumys isteý úshin Túrkıaǵa ushqanyn aıtty. Bul men úshin soqqy boldy. Keıin ol ózi beıtanys nómirden qońyraý shalyp: "Anashym, men túrmedemin, Gresıadamyn" dedi. Instagram-da jumys týraly habarlandyrýdy kórgenin aıtty. Oǵan ushaq bıletin tólep, týrıserge arnalǵan motorly qaıyqpen serýendeýge baılanysty jumys ýáde etken. Keıin zańsyz mıgranttardy tasymaldaý týraly ekeni belgili boldy. Ol óziniń nege tartylǵanyn túsinbedi», — dedi áıel.
Nurhan Qadyrovanyń aıtýynsha, onyń uly shet tilin bilmeıdi, janynda aýdarmashy bolmaǵan. «Oǵan jaı ǵana qujattarǵa qol qoıý kerektigin aıtqan, áıtpese merzim odan ári uzarady degen. Qazir oǵan 125 jyl bas bostandyǵynan aıyrý jazasy jáne aıyppul salyndy, ol teńgege shaqqanda 1 mlrd teńgeni quraıdy. Ol óte jas, aqsha tapqysy keldi, biraq osyndaı qıyndyqqa tap boldy», — dep qosty áıel.
NUR.KZ tilshisi QR Syrtqy ister mınıstrliginiń baspasóz qyzmetine saýal joldady.
«Qazaqstan Respýblıkasynyń Syrtqy ister mınıstrligi Gresıada jazasyn ótep jatqan Qazaqstan azamaty týraly biledi. Atalǵan azamat grektik sottyń sheshimimen mıgranttardy zańsyz tasymaldaý úshin jaýapkershilik kózdeıtin bap boıynsha sottaldy. Jergilikti zańnamaǵa sáıkes, bul áreket aýyr qylmystar sanatyna jatady. Bizdiń Gresıadaǵy dıplomattarymyz óz quzyreti sheginde azamatqa qajetti konsýldyq-quqyqtyq kómek kórsetýde. Másele baqylaýda», — delingen jaýapta.