2026 jyldyń 11 shildesinen bastap respýblıkalyq mańyzy bar «Taldyqorǵan – Óskemen» tas joly ýchaskesi aqyly boldy. Segiz aýdannyń turǵyndary úshin jeńildikti abonementter qarastyrylsa, qalǵan júrgizýshiler úshin tegin balama baǵyt qoljetimdi, dep habarlaıdy infohub.kz.
«QazAvtoJol» UK» AQ «Aqyly avtomobıl joldary dıreksıasy» fılıalynyń naqtylaýynsha, jeńildikter Eskeldi, Aqsý, Sarqan, Alakól, Úrjar, Aıagóz, Jarma jáne Ulan aýdandarynda tirkelgen kólikterge qoldanylady. Abonement quny kólik túrine baılanysty: jeńil avtomobılder úshin tek jyldyq jol júrý qujaty – 1 AEK; 16 orynǵa deıingi mıkroavtobýstar men 2,5 t-ǵa deıingi jeńil júk kólikteri úshin – aıyna 1 AEK nemese jylyna 12 AEK; 32 orynǵa deıingi avtobýstar men 5,5 t-ǵa deıingi júk kólikteri úshin – aıyna 2 AEK nemese jylyna 24 AEK; 32 orynnan asatyn úlken avtobýstar men 10 t-ǵa deıingi júk avtopoıyzdary úshin – aıyna 3 AEK nemese jylyna 36 AEK; 10 t-dan 15 t-ǵa deıingi júk kólikteri úshin – aıyna 4 AEK nemese jylyna 48 AEK; 15 t-dan aýyr fýrlar, aýyr júk kólikteri men tirkemeli traktorlar úshin – aıyna 5 AEK nemese jylyna 60 AEK. Abonementti kaztoll.kz saıtynda onlaın, 1403 tegin nómiri boıynsha, sondaı-aq aqy alý pýnktteri men klıentterge qyzmet kórsetý ortalyqtarynda resimdeýge bolady.
Kompanıada aqyly joldar tek tegin balama bolǵan jaǵdaıda ǵana engiziletinin jáne tarıfterdiń resmı memlekettik kelisýden ótkenin atap ótti.
Balama baǵyt oblystyq mańyzy bar Taldyqorǵan – Úshtóbe – Molaly – Lepsi – Aqtoǵaı – Tansyq – Aıagóz – Qaraýyl – Semeı joly men respýblıkalyq mańyzy bar Semeı – Óskemen jolyn qamtıdy. «Bul aınalma joldardy jóndeý jáne jaǵdaıyn jaqsartý jumystary jol tóseminiń sapasyn júıeli tekserý nátıjelerine qaraı kezeń-kezeńimen júrgizilýde», – dep atap ótti «QazAvtoJolda».
Kompanıanyń málimetinshe, jańa aqyly ýchaskede jol tóseminiń aqaýlary joq. Tas jol boıynda 24 jol boıyndaǵy servıs nysany jumys isteıdi, onyń ishinde JJM beketteri, qonaqúıler, kempıngter men dámhanalar bar; 23 demalys alańy jabdyqtalǵan, keıbirinde shatyrlar men óz betinshe jóndeýge arnalǵan estakadalar ornatylǵan; sondaı-aq 14 abattandyrylǵan jyly dárethana jumys isteıdi.
«Jol boıyndaǵy servıs nysandarynyń jelisin damytý jalǵasýda. Qozǵalys qarqyndylyǵy artyp, ınvestorlar tartylǵan saıyn jańa jol boıy servıs nysandaryn kezeń-kezeńimen qurý kózdelýde, bul aqyly avtomobıl jolyn paıdalanýshylarǵa qyzmet kórsetý deńgeıin odan ári arttyrýǵa jáne zamanaýı talaptarǵa sáıkestikti qamtamasyz etýge múmkindik beredi», – dep túıindedi kompanıada.