Qostanaı oblysyndaǵy «Altyn dala» memlekettik tabıǵı rezervatynda 22 tamyzda Prjevalskı jylqysynyń tuńǵysh qulyny dúnıege keldi. Bul — Qazaqstanǵa ákelingen janýarlardyń alǵashqy tóli, dep habarlaıdy infohub.kz saıty.
Qulyn «Alıbı» jabaıy tuıaqtylardy reıntrodýksıalaý ortalyǵynda týǵan. Ol — erkek. Týǵannan keıin kóp uzamaı aıaǵynan tik turyp, anasynyń sońynan erdi.
Mınıstrliktiń málimetinshe, qulyn men bıe ózderin jaqsy sezinýde.
«Qulynnyń týýy reıntrodýksıa baǵdarlamasyn júzege asyrýdyń mańyzdy nátıjesi boldy jáne janýarlardyń qazaq dalasynyń tabıǵı jaǵdaıyna sátti beıimdelgenin kórsetedi», — dep habarlady Ekologıa mınıstrligi.
Qulynnyń anasy — jeti jasar Tessa atty bıe. Ony 2024 jyly Berlındegi Tırparkten Qazaqstanǵa ákelgen. Bul — onyń alǵashqy tóli.
Qazir qulyn anasymen jáne basqa jylqylarmen birge júr. Mamandar olardyń jaǵdaıy men minez-qulqyn baqylaýdy jalǵastyrýda.
Prjevalskı jylqysy, nemese kerqulan, Eýrazıadaǵy jabaıy jylqylardyń sońǵy saqtalǵan túri bolyp sanalady. HH ǵasyrda ol tabıǵatta joıyldy, biraq haıýanattar baǵynda ósirý arqyly túrdi saqtap qalý múmkin boldy.
Prjevalskı jylqysyn Qazaqstanǵa qaıtarý baǵdarlamasy 2024 jyly bastaldy. Sol kezde «Altyn dala» rezervatyna jeti janýar ákelindi. 2025 jyly taǵy jeti, al 2026 jyly segiz jylqy jetkizildi.
2029 jylǵa deıin Qazaqstanǵa shamamen 40 jylqy ákelý josparlanýda. Baǵdarlamanyń maqsaty — tabıǵatta ózdiginen kóbeıe alatyn turaqty popýlásıa qurý.