Qazaqstandyq áýe tasymaldaýshylar Air Astana jáne FlyArystan Dýbaıǵa reısterdi toqtatýdy taǵy da uzartty, dep habarlaıdy infohub.kz saıty.
FlyArystan Aqtaý – Dýbaı – Aqtaý baǵyty boıynsha reısterdiń ýaqytsha toqtatylýyn 2026 jyldyń 30 qyrkúıegine deıin uzartatynyn habarlady. Bul sheshim Taıaý Shyǵystaǵy turaqsyz jaǵdaıǵa baılanysty qabyldandy. Buǵan deıin tasymaldaýshy reısterdi 15 qyrkúıekke deıin toqtatatynyn málimdegen edi.
Qazirgi ýaqytta Aqtaý – Dýbaı – Aqtaý baǵyty boıynsha bıletter qysqy keste aıasynda 3 qazannan bastap qoljetimdi. Ári qaraıǵy ózgerister týraly qosymsha habarlanatyn bolady.
Toqtatylǵan reısterdiń jolaýshylaryna keıinirek kúnge tegin qaıta brondaý nemese satyp alý orny boıynsha aıyppulsyz bılet qunyn tolyq qaıtarý usynylady.
Air Astana óz kezeginde Parsy shyǵanaǵy aımaǵyndaǵy turaqsyzdyqqa baılanysty Almaty men Astanadan Dýbaıǵa reısterdiń toqtatylýyn 2026 jyldyń 30 qyrkúıegine deıin uzartady. Qazan aıyna bul baǵyttar boıynsha keste reıs jıiligin qysqartýmen túzetildi.
Toqtatylǵan reısterdiń jolaýshylaryna sol brondaý klasynda 2026 jyldyń 20 qarashasyna deıingi reısterge tegin qaıta brondaý usynylady. Sondaı-aq satyp alý orny boıynsha bılet qunyn tolyq qaıtarýǵa nemese Air Astana-nyń basqa halyqaralyq baǵyttaryna bıletti tegin aýystyrýǵa bolady, tarıf aıyrmashylyǵy bolǵan jaǵdaıda ol tólenedi.