Qazaqstanda shilde aıynyń úsh aptasynda áleýmettik mańyzy bar azyq-túlik taýarlarynyń ortasha baǵa ındeksi 0,1%-ǵa tómendedi, dep habarlaıdy infohub.kz saıty.
Saýda mınıstrliginiń dereginshe, sońǵy aptada qyzanaq 15,1%-ǵa, qıar 18,2%-ǵa, sábiz 5,2%-ǵa, jumyrtqa 2,4%-ǵa arzandaǵan. Al ettiń keıbir túrleriniń baǵasy ósip jatyr: qoı eti 2%-ǵa, jylqy eti 1,3%-ǵa, tartylǵan et 0,6%-ǵa qymbattady.
Osyǵan baılanysty Premer-Mınıstrdiń orynbasary Serik Jumanǵarın et jáne et ónimderi naryǵyn óndiris kólemi, ishki tutyný jáne eksporttyq jetkizilimderdi eskere otyryp, tereń taldaý júrgizýdi tapsyrdy. Ol sondaı-aq memlekettik organdar men ákimdikterge naryq qatysýshylarymen nysanaly jumys júrgizýdi mindettedi.
«Baǵanyń aıtarlyqtaı ósken árbir jaǵdaıynda jetkizý tizbeginiń búkil uzyndyǵyna taldaý jasap, qymbattaýdyń sebepterin joıý qajet. Tıisti mınıstrlikter men ákimdikterge iri kóterme jetkizýshiler men ımporttaýshylarmen kezdesýler ótkizýdi, bar kedergilerdi anyqtaýdy jáne olardyń baǵa turaqtylyǵyn qamtamasyz etý boıynsha qarsy mindettemeler qabyldaýymen memlekettik qoldaýdyń qajetti sharalaryn ázirleýdi tapsyramyn. Dál osyndaı júıeli jumysty azyq-túlik emes taýarlar men aqyly qyzmetterge de tıisti naryqtardyń erekshelikterin eskere otyryp uıymdastyrý qajet. Árbir memlekettik organ óz quzyreti sheginde sharalardy iske asyrýdy qamtamasyz etýi kerek», — dedi Jumanǵarın.
Baǵany odan ári turaqtandyrý úshin Úkimet otandyq óndirýshilerge qoldaýdy arttyrýdy, nan óndirýshi kásiporyndarǵa elektr energıasyna jeńildikti tarıfter engizýdi jáne el ishinde áleýmettik mańyzy bar ónimderdi temirjol kóligimen tasymaldaýǵa 70% jeńildik berýdi josparlap otyr.
Buǵan deıin qazaqstandyqtardy et baǵasynyń kúrt ósýi týraly eskertken bolatyn.