2026 jylǵy 13 qyrkúıekten bastap Qazaqstanda bazalyq banktik lısenzıasy bar bankterge aktıvter kólemi men jeke tulǵalardyń depozıtterine qatysty shekteýler kúshine enedi. Tıisti qaýlyny Qarjy naryǵyn retteý jáne damytý agenttigi qabyldady, dep habarlaıdy infohub.kz saıty.
Jańa erejelerge sáıkes, mundaı banktiń jıyntyq aktıvteriniń shekti kólemi 500 mlrd teńgeden aspaýy tıis. Kórsetkish ár aıdyń esepti kúnine — tıisti aıdyń sońǵy jumys kúnine esepteletin bolady.
Jeke tulǵalardyń depozıtteri úshin jeke lımıtter belgilengen. Ulttyq valútadaǵy jınaq salymynyń mólsheri 20 mln teńgeden aspaýy kerek. Bank shottaryndaǵy qarajatty qosa alǵanda, teńgemen salynatyn basqa depozıtter úshin shek 10 mln teńgeni quraıdy.
Bank shottaryndaǵy aqshany qosa alǵanda, shetel valútasyndaǵy depozıtter boıynsha eń joǵary mólsher 5 mln teńge bolady.
Eger bir klıent bazalyq lısenzıasy bar bankke depozıtterdiń birneshe túrin ornalastyrsa nemese birneshe banktik shot ashsa, barlyq salymdar men shottar boıynsha jıyntyq kúndelikti qaldyq 20 mln teńgeden aspaýy tıis.
Qarjy naryǵyn retteý jáne damytý agenttiginde bazalyq lısenzıasy bar bankter operasıalardyń shekteýli tizbesi bar bankterdiń jańa túri bolyp tabylatynyn túsindirdi. Belgilengen depozıttik shekteýler qoldanystaǵy bankterge qoldanylmaıdy, óıtkeni olar ámbebap banktik lısenzıa negizinde jumys isteıdi.
QR Qarjy naryǵyn retteý jáne damytý agenttigi Basqarmasynyń №124 qaýlysy 2026 jylǵy 13 qyrkúıekte kúshine enedi.
Buǵan deıin 1 tamyzdaǵy jaǵdaı boıynsha qazaqstandyq bankterdegi halyq pen bıznestiń depozıtteriniń kólemi 51,7 trln teńgege jetkeni habarlanǵan bolatyn. Jeke tulǵalardyń salymdary 30,5 trln teńgeni qurasa, kompanıalardyń depozıtteri 21 trln teńgeden asty. Shilde qorytyndysy boıynsha depozıttik baza Kaspi Bank, Forte Bank jáne Halyk Bank-te barynsha ósti.