Qazaqstan Respýblıkasynyń Densaýlyq saqtaý mınıstrligi «Memlekettiń qajettiligin qamtamasyz etýge arnalǵan bıofarmasevtıkalyq ónimdi aıqyndaý týraly» buıryq jobasyn daıyndady. Qujat Qazaqstan Respýblıkasynyń «Bıologıalyq qaýipsizdik týraly» zańynyń 19-2-babynyń 2-tarmaǵyna sáıkes ázirlengen. Onyń maqsaty — ımportqa táýeldilikti azaıtý, mamandandyrylǵan preparattardy otandyq óndirýdi saqtap qalý jáne eldiń epıdemıologıalyq asqynýlarǵa daıyndyǵyn qamtamasyz etý, dep habarlaıdy infohub.kz saıty.
Jobanyń negizdemesinde atap ótilgendeı, mamandandyrylǵan preparattardyń kepildi otandyq kózi bolǵan jaǵdaıda ınfeksıa oshaqtary paıda bolǵan kezde zerthanalyq den qoıýdy jedel júrgizýge múmkindik týady.
Buıryq jobasynda otandyq ónim epıdemıologıalyq jáne epızootologıalyq monıtorıń júrgizýge, sondaı-aq beıindi zerthanalar men epıdemıaǵa qarsy qyzmetterdiń turaqty daıyndyǵyn ustap turýǵa qajet ekeni túsindiriledi.
«Mamandandyrylǵan bıofarmasevtıkalyq ónimdi el ishinde óndirýdi saqtaý ımporttyq jetkizilimderge táýeldilikti jáne soǵan baılanysty tapshylyq qaýpin azaıtýǵa tıis», — dep atap ótti buıryq jobasyn ázirleýshiler.
Mundaı qaýipter ásirese epıdemıologıalyq asqyný, tótenshe jaǵdaılar, halyqaralyq logıstıkanyń shektelýi nemese mamandandyrylǵan preparattarǵa suranystyń kúrt artýy kezinde ózekti.
Otandyq óndiristik baza bolǵan jaǵdaıda qajet kezde ónimniń qajetti toptamalaryn jedel shyǵaryp, memlekettik qajettilikke qor jasaqtaýǵa múmkindik týady.
Buıryq jobasy tehnologıalyq táýelsizdikti jáne júıeniń turaqty daıyndyǵyn qamtamasyz etýge, ımportqa táýeldilikti azaıtýǵa jáne memlekettik uıymdardy mamandandyrylǵan bıofarmasevtıkalyq ónimmen turaqty jabdyqtaýǵa baǵyttalǵan.
Osylaısha, qujat bıologıalyq qaýipsizdik salasyndaǵy mindetterdi oryndaý úshin memleketke turaqty negizde qoljetimdi bolýy tıis ónimdi aıqyndaýdyń normatıvtik negizin qalyptastyrýdy kózdeıdi.