Қазақстан БҰҰ-ның электрондық үкіметті дамыту рейтингінде алғаш рет үздік жиырма елдің қатарына еніп, осындай деңгейге жеткен аймақтағы тұңғыш мемлекет атанды, деп хабарлайды infohub.kz сайты.
Жасанды интеллект және цифрландыру министрлігінің мәліметінше, республика БҰҰ-ның Электрондық үкіметті дамыту индексінде (UN EGDI) 24-орыннан 16-орынға көтеріліп, алғаш рет ең жоғары рейтингтік сыныпқа енді. «Екі жылда сегіз сатыға өрлеу — БҰҰ баяндамасында бұл көтерілу көшбасшы елдер арасындағы ең елеулі өсімнің бірі деп аталды. Қазақстан осындай деңгейге жеткен аймақтағы тұңғыш мемлекет болды», — делінген ведомство хабарламасында.
Ең жоғары рейтингтік сынып әлемдегі электрондық үкіметі ең дамыған 21 мемлекетті біріктіретіні атап өтілді. Енді Қазақстан Оңтүстік Корея, Дания, Сингапур, Ұлыбритания, Эстония және АҚШ-пен бір топта. 2026 жылы бұл сыныпқа барлығы үш ел ғана алғаш рет енді: Қазақстан, Ирландия және Польша.
Екі жыл ішінде Қазақстан 2024 жылы алда тұрған Швеция, Германия, Ирландия, Жаңа Зеландия, Австрия және Жапонияны басып озды. Елдің индексі 0,9009-дан 0,9363-ке дейін өсті, әлемдік орташа көрсеткіш 0,6675.
«Екі жылда цифрлық мемлекеттің эталоны саналатын Эстониямен айырмашылық төрт есе қысқарды. ТМД және Орталық Азия елдері арасында Қазақстан тағы да бірінші. Әлемдік рейтингте Өзбекстан 32-орында, Әзірбайжан — 38-орында, Ресей — 50-орында», — деп мәлімдеді Жасанды интеллект және цифрландыру министрлігінде.
Өсім барлық негізгі бағыттар бойынша қамтамасыз етілді. БҰҰ байланыс саласындағы айтарлықтай ілгерілеуді атап өтті: ұялы байланыс пен интернеттің қолжетімділігі бойынша Қазақстан әлемде 41-орыннан 13-орынға көтеріліп, телекоммуникациялық инфрақұрылым деңгейі бойынша Эстониямен теңесті. Азаматтардың цифрлық сауаттылық көрсеткіші шамамен бір жарым есе өсті, ал білім мен дағды деңгейі бойынша ел шамамен 42-орыннан 28-орынға көтерілді. Цифрлық үкіметтің құқықтық базасы БҰҰ-ның ең жоғары бағасын алды.
«БҰҰ баяндамасында Орталық Азия 2026 жылдың басты табыс тарихтарының бірі деп аталды. eGov.kz және eGov Mobile экожүйесі интеграцияланған цифрлық мемлекеттің үлгісі ретінде, ал alem.ai халықаралық орталығы білім, зерттеу, стартап және қолданбалы жасанды интеллект алаңы ретінде атап өтілді. БҰҰ сарапшыларының бағалауынша, Қазақстан қазірдің өзінде биік деңгейге сүйене отырып, ұстанымын нығайта бермек, мұнда сөз жекелеген сайттар туралы емес, мемлекеттік органдардың өзара іс-қимыл платформалары, цифрлық сәйкестендіру, мобильді сервистер мен ХҚО-лар бірге жұмыс істейтін біртұтас жүйе туралы», — деп хабарлады ведомство.


