Qazaqstannyń NVIDIA jáne Firebird AI-men birlesip damytyp jatqan Data Center Valley jobasy aıasyndaǵy alǵashqy derekter ortalyǵyn 2027 jyly maýsymda paıdalanýǵa berý josparlanýda. Bul týraly premer-mınıstr Oljas Bektenovtiń tóraǵalyǵymen ótken keńeste «Qazaqtelekom» basshysy Baǵdat Mýsın málimdedi, dep habarlaıdy infohub.kz saıty.
Onyń aıtýynsha, qýaty 50 MVt bolatyn alǵashqy nysannyń qurylysy qazirdiń ózinde júrip jatyr. Qazir energoortalyqtar men AI-fabrıkalarǵa arnalǵan shuńqyrlardy ázirleý jumystary 90%-ǵa aıaqtalǵan. Alańda energoortalyqtardyń irgetasyn qalaý bastalyp, ákimshilik-turmystyq ǵımarattardy salý jalǵasýda.
2026 jyldyń jeltoqsan aıynyń sońyna deıin merdigerler derekter ortalyǵy men energobloktardyń negizgi korpýstaryn, ákimshilik-turmystyq keshendi, baqylaý-ótkizý pýnktterin jáne syrtqy ınjenerlik jelilerdiń bir bóligin salýy tıis. İske qosý-retteý jumystaryn 2027 jyly mamyrda aıaqtaý josparlanýda.
«Bizdiń basty mindetimiz – alǵashqy nysannyń qurylysyn 2027 jyly maýsymda aıaqtaý. Sonymen qatar, klıentter tarapynan rastalǵan suranysty eskere otyryp, kampýs qýatyn kezeń-kezeńimen arttyrýǵa múmkindik beretin ınjenerlik negizdi jasap jatyrmyz», – dedi Mýsın.
Jobany elektrmen jabdyqtaý úshin qýaty 215 MVt qosalqy stansıa satyp alynǵan. Sondaı-aq sýmen jabdyqtaý jelileriniń jobasy ázirlenip, telekomýnıkasıalyq ınfraqurylymdy jobalaý jalǵasýda. Qurylys alańynda táýlik boıy onlaın beınebaqylaý júıesi jumys isteıdi. Bolashaqta Data Center Valley qýatyn kezeń-kezeńimen 1 GVt-qa deıin arttyrý josparlanýda.
Joba derekter ortalyqtaryn, AI-fabrıkalardy, GPU-klasterlerdi jáne halyqaralyq tehnologıalyq kompanıalardyń bultty platformalaryn ornalastyrýǵa arnalǵan alań qurýdy kózdeıdi. Úkimette bul Qazaqstanda sıfrlyq ekonomıkanyń jańa eksporttyq sektoryn qurýǵa jáne jasandy ıntellekt salasyndaǵy otandyq ázirlemelerge ınfraqurylymdy qamtamasyz etýge múmkindik beredi dep sanaıdy.
«Data Center Valley Qazaqstannyń jańa eksporttyq áleýetin qalyptastyrady. Esepteý qýattaryn el ishinde ornalastyra otyryp, biz otandyq AI-sheshimderdi damytýǵa, jahandyq kompanıalardy tartýǵa jáne Qazaqstannyń halyqaralyq sıfrlyq qyzmetter naryǵyna shyǵýyna jaǵdaı jasaımyz», – dep atap ótti jasandy ıntellekt jáne sıfrlyq damý mınıstri Jaslan Madıev.
Data Center Valley aıasynda Qazaqstan Firebird AI jáne NVIDIA-men yntymaqtastyqty da damytýda. Buǵan deıin, 2026 jyldyń sáýirinde prezıdent Qasym-Jomart Toqaev NVIDIA-nyń jahandyq AI-ınfraqurylymdy damytý jónindegi vıse-prezıdenti Nıkolo Martın Kaprezamen jáne Firebird AI negizin qalaýshylar Razmıg Berg Ovakımán men Aleksandr Esaıanmen kezdesken bolatyn. Sonda taraptar AI-ınfraqurylymdy jobalaý, salý jáne paıdalaný boıynsha birlesken jumys perspektıvalaryn talqylady.
Kezdesý barysynda memleket basshysy Ekibastuzda Data Center Valley qurý josparlary týraly aıtyp, ony qoljetimdi elektr energıasy, telekomýnıkasıalar jáne ınvestorlarǵa salyqtyq preferensıalar bar alań retinde sıpattady. Kelissózder qorytyndysy boıynsha taraptar AI-ekojúıeni damytýda birlesken qyzmet múmkindikterin zerdeleýge kelisti.
Sonymen qatar, premer-mınıstr keńesinde Cloud First Policy (Data Embassy) jobasyn daıyndaý máselesi qaraldy. Bul joba shet memleketterdiń derekterin olardyń tolyq zańdy egemendigin saqtaı otyryp, Qazaqstanda ornalastyrýǵa múmkindik beredi.
Keńes qorytyndysy boıynsha Bektenov memlekettik organdar men kvazımemlekettik kompanıalarǵa qurylys jumystaryn belgilengen merzimde oryndaýdy qamtamasyz etýdi jáne sheteldik tehnologıalyq seriktesterdi tartý jumystaryn jalǵastyrýdy tapsyrdy.
Buǵan deıin «Kýrsıv» Qazaqstanda halyqaralyq esepteý qýattary habyn qurý nıeti týraly jazǵan bolatyn.