«Astana» halyqaralyq qarjy ortalyǵy (AHQO) ınvestısıalyq salyq rezıdenttigi baǵdarlamasyn (ITRP) keńeıtip, oǵan sıfrlyq aktıvterdi qosty. Endi sheteldik ınvestorlar AHQO-nyń lısenzıalanǵan alańdary arqyly sıfrlyq aktıvterge qarajat salyp, Qazaqstannyń uzaq merzimdi ınvestorlyq vızasy men salyq rezıdenttigin ala alady, dep habarlaıdy infohub.kz.
Buǵan deıin baǵdarlamaǵa qatysýshylar AHQO-da tirkelgen aksıalarǵa, úlesterge, qor paılaryna, AIX bırjasyndaǵy baǵaly qaǵazdarǵa, sondaı-aq ortalyqta tirkelgen kompanıalardyń jarǵylyq kapıtalyna ınvestısıa sala alatyn. Bul quraldar boıynsha ınvestısıanyń eń tómengi mólsheri 60 myń AQSh dollarynan bastap belgilengen edi.
Endi olarǵa AFSA (AHQO qarjy qyzmetterin retteý komıteti) lısenzıasy bar operatorlar arqyly qoljetimdi sıfrlyq aktıvter qosyldy. Bul nusqa úshin ınvestısıanyń eń tómengi mólsheri 150 myń dollardy quraıdy jáne baǵdarlamaǵa qatysý kezeńinde osy somany saqtaý qajet.
Investısıalyq salyq rezıdenttigi baǵdarlamasy shetel azamattaryna bekitilgen quraldarǵa ınvestısıa salyp, jeńildetilgen tártippen salyq rezıdenttigin alýǵa múmkindik beredi. Qatysýǵa 18 jastan asqan, Qazaqstan azamaty emes jáne sońǵy 20 jyl ishinde eldiń salyq rezıdenti bolmaǵan tulǵalar quqyly.
AHQO-da bul sheshim Qazaqstandaǵy sıfrlyq aktıvter naryǵynyń damýyna baılanysty ekenin atap ótti. 2026 jyly Prezıdent Qasym-Jomart Toqaev sıfrlyq aktıvter ındýstrıasyn yntalandyrý jáne damytý týraly jarlyqqa qol qoıdy. Bul jarlyq salany retteýdi jetildirýge, sıfrlyq qarjy ınfraqurylymyn damytýǵa jáne eldiń ınvestısıalyq tartymdylyǵyn arttyrýǵa baǵyttalǵan.
«Bizdiń baǵdarlama halyqaralyq ınvestorlarǵa arnalǵan quraldar tizimin sıfrlyq aktıvterdi qosý arqyly keńeıtti. Bul ınvestorlarǵa AHQO ekojúıesindegi ınvestısıalyq múmkindikterge qol jetkizýge, sondaı-aq sıfrlyq aktıvterdi eldiń qarjy-tehnologıalyq arhıtektýrasynyń bóligi retinde damytýǵa yqpal etedi», – dedi AHQO Ekspat ortalyǵynyń dırektory Aınur Jumatova.
AHQO-da jańa quraldyń iske qosylýy ortalyqtyń kapıtal tartýǵa arnalǵan halyqaralyq alań retindegi pozısıasyn nyǵaıtýǵa jáne ınvestorlarǵa zamanaýı qarjy múmkindikterine qol jetkizýge kómektesedi dep sanaıdy.
Jańa erejeler baǵdarlama aktisi AHQO resmı saıtynda jarıalanǵan kúnnen bastap kúshine enedi.