Qazaqstanda azamattardyń derbes derekteriniń taralýy kezindegi is-qımyl tártibin retteıtin jańa erejeler bekitildi. Tıisti qujatqa Premer-Mınıstrdiń orynbasary — jasandy ıntellekt jáne sıfrlyq damý mınıstri buıryqqa qol qoıdy, dep habarlaıdy infohub.kz saıty.
Atap ótilgendeı, respýblıkada derbes derekter qaýipsizdiginiń buzylýy týraly habarlaý erejeleri ázirlendi. Qujatta alǵash ret «derbes derekter qaýipsizdiginiń buzylýy» degen uǵymnyń ózi bekitildi. Ol derbes derekterdiń zańsyz taralýyna, ózgertilýine, joıylýyna nemese joıylyp ketýine, sondaı-aq olarǵa ruqsatsyz qol jetkizilýine ákep soqqan qorǵaý buzylysy retinde túsindiriledi.
Jańa talaptarǵa sáıkes, mundaı buzýshylyq anyqtalǵan kezde derekqordyń menshik ıesi nemese operatory ýákiletti organdy bir jumys kúni ishinde habardar etýge mindetti. Habarlamada derbes derekterdi óńdeýdi uıymdastyrýǵa jaýapty tulǵanyń baılanys derekteri (bar bolsa), sondaı-aq buzýshylyqty joıý úshin qabyldanǵan sharalar kórsetilýi tıis.
Sonymen qatar, habarlamaǵa sýbektilerge keıinnen habarlama jiberý úshin qajetti derbes derekter qosylady: tegi, aty jáne ákesiniń aty (bar bolsa), jáne (nemese) jeke sáıkestendirý nómiri (JSN), jáne (nemese) uıaly baılanys abonenttik nómiri.
Buıryqta derbes derekter dep neniń esepteletini de túsindiriledi. Bul — derbes derekter sýbektisi týraly bir nemese birneshe derbes derekter ıdentıfıkatorymen tolyqtyrylǵan málimetter nemese málimetter jıyntyǵy. Derbes derekteri bar derekqordyń nemese sıfrlyq obektiniń menshik ıesi memlekettik organ, osyndaı derekqorǵa nemese sıfrlyq obektige ıelik etetin, paıdalanatyn jáne ony basqaratyn jeke nemese zańdy tulǵa bola alady. Operator dep derbes derekterdi jınaýdy, óńdeýdi jáne qorǵaýdy júzege asyratyn tulǵa nemese memlekettik organ esepteledi.
Aıta keteıik, buıryq 22 qyrkúıekten bastap qoldanysqa engiziledi.
Eske salaıyq, tamyz aıynda Mash basylymy 15 mln qazaqstandyqtyń derekteri jelige taralǵanyn málimdegen bolatyn. Jasandy ıntellekt jáne sıfrlyq damý mınıstrligi bul aqparatqa jaýap berdi. Alaıda birneshe saǵattan keıin Mınıstrlik eGov buzylǵanyn jáne 15 mıllıon azamattyń derekteriniń taralǵanyn joqqa shyǵardy. Tekserý darknette satylǵan faıldardyń júıege qatysy joq ekenin kórsetti.