Qazaqstan álemniń 95 eli arasynda zeınette jaıly ómir súrý quny boıynsha 72-orynǵa ıe boldy. Ol úshin zeınetkerge $294 myń kóleminde jınaq kapıtaly qajet ekeni NetCredit jáne Numbeo birlesken zertteýinde aıtylǵan. Bul týraly infohub.kz saıty habarlaıdy.
Analıtıkter ortasha amerıkandyq úshin jaıly zeınetke qajetti jınaq somasyn AQSH-taǵy ortasha zeınet jasy men ómir súrý uzaqtyǵyna súıene otyryp eseptedi. Model qarttyq kezeńin 14 jyl 8,4 aı dep belgileıdi. Sonymen qatar, esep avtorlary medısınalyq qyzmet kórsetý jáne salyq tóleý shyǵyndaryn eskermegen.
Osylaısha, Qazaqstanda shamamen 15 jylǵa jýyq jaıly zeınet úshin $294 myń jınaqtaý qajet bolsa, mundaı zeınetker aıyna shamamen $1,67 myń nemese 770 myń teńge jumsaı alady.
Zertteýden sondaı-aq, reıtıńke engen Eýrazıalyq ekonomıkalyq odaq (EAEO) elderi arasynda Qazaqstan eń qymbaty bolyp shyqty: Reseıde (77-oryn) mundaı zeınet úshin $281 myń, al Belarýste (85-oryn) $267 myń qajet. Armenıa men Qyrǵyzstan reıtıńke múlde enbegen.
Ortalyq Azıada analıtıkter tek eki eldi baǵalady. Ózbekstan qymbattyǵy boıynsha Qazaqstannan ozyp, $331 myń qajet kapıtalmen 56-orynǵa ornalasty. Jalpy álemdik reıtıńte Qazaqstannyń eń jaqyn kórshileri Vetnam (71-oryn, $295 myń) jáne Malaızıa (73-oryn, $292 myń) boldy.
Álemdegi eń qymbat elder tizimin Sıngapýr bastady, onda zeınette jaıly ómir súrý úshin $1,1 mln jınaý kerek. Úzdik úshtikke Islandıa ($893 myń) jáne Shveısarıa ($859 myń) endi. Eń qoljetimdisi Pákistan (95-oryn) boldy, onda zeınetkerge $187 myń jetedi. Tizimniń eń tómengi jaǵynda Pákistanmen qatar Úndistan ($189 myń), sondaı-aq Bangladesh pen Mysyr (ekeýi de $190 myń) ornalasty.
Salystyrý úshin: AQSH-ta qartaıǵanda jaıly demalys úshin $738 myń (5-oryn), Kanadada $598 myń, al Meksıkada $356 myń tóleýge týra keledi. Zertteýdegi eń qymbat jáne eń arzan memleket arasyndaǵy aıyrmashylyq $900 myńnan asty.
Sondaı-aq, Túrkıanyń Qazaqstannan qymbatyraq bolǵany qyzyqty – 46-oryn jáne $361 myń jınaq. Al Qytaı, kerisinshe, $15 myńǵa arzan – 79-oryn jáne $279 myń.