Jeke mektepterdi qarjylandyrýdy sıfrlandyrý Qazaqstanǵa tórt aıda 8 mlrd teńge únemdeýge múmkindik berdi, dep habarlaıdy infohub.kz saıty.
Úkimet baspasóz qyzmetiniń málimetinshe, endi memlekettik bilim berý tapsyrysy tekserilgen derekter negizinde esepteledi, al bilim berý qyzmetterine aqy tóleý sıfrlyq quraldar arqyly júzege asady.
2025 jyldyń kúzinde Qazaqstanda OrtaBilim servısi iske qosyldy. Ol jeke mektepterdiń jan basyna shaqqandaǵy qarjylandyrýyn Qarjy mınıstrliginiń e-Qazyna platformasyna aýdardy. Memlekettik tapsyrysty ornalastyrý bilim berý basqarmalaryna berildi.
Qarjylandyrý somasy oqýshylar sany, oqý jaǵdaılary jáne belgilengen normatıvter eskerile otyryp, avtomatty túrde esepteledi. Kontıngent týraly derekter «Kúndelik» júıesi jáne basqa da memlekettik organdardyń derekqorlarymen ıntegrasıa arqyly naqty ýaqyt rejıminde tekseriledi.
Qazirgi ýaqytta platformada 899 jeke mektep sıfrlandyrylǵan. 2026 jyldyń qańtar–mamyr aılarynda operator 749 mekteptiń aktilerin 102,9 mlrd teńgege tóledi.
Sıfrlyq tekserý oqýǵa arnalmaǵan ǵımarattarda — kotejderde, keńselerde jáne burynǵy óndiristik úı-jaılarda ornalasqan 145 mektepti anyqtady. Olar boıynsha memlekettik tapsyrys kólemi 38 mlrd teńgeni quraıdy.
2027 jyldyń 1 qańtarynan bastap ǵımarattary bilim berý qyzmetine arnalmaǵan jeke mektepterde memlekettik tapsyrys qarjylandyrylmaıdy.
Osy ýaqytqa deıin mektep ıeleri nysandardy sanıtarlyq jáne qala qurylysy talaptaryna sáıkestendire alady. Reforma búdjet qarajatyn shynymen bilim berý qyzmetin kórsetetin jáne belgilengen normalarǵa sáıkes keletin mektepterdiń alýyna baǵyttalǵan.