Qazaqstandyq ınvestısıalyq kompanıa Fonte Capital Reseıdiń «Samolet» tobynyń 18% aksıasyn satyp aldy. Bul — Reseıdegi qurylys naryǵynyń kólemi boıynsha jetekshi kompanıalardyń biri, dep habarlaıdy infohub.kz.
«Samolet» toby kompanıa negizin qalaýshy Mıhaıl Kenınniń muragerlerine tıesili «Gorızont» qoryna tıesili jaı aksıalar paketin satý mámilesi aıaqtalǵanyn málimdedi. Satyp alýshy — «Astana» halyqaralyq qarjy ortalyǵynda (MQOA) tirkelgen jáne qazaqstandyq ınvestor qurylymyna kiretin Fonte Inceptia Alpha Fund OEIC Limited kompanıasy.
«Kommersant» baǵalaýynsha, mámile somasy shamamen 4,2 mlrd rúbldi (shamamen 25,5 mlrd teńge) qurady. Kompanıada mámile barlyq qajetti retteýshi organdardyń maquldaýyn alǵanyn atap ótti.
Fonte Capital dırektory Erjan Mýsın «Samolettegi» úlesti satyp alý Fonte Inceptia Alpha Fund OEIC qorynyń jyljymaıtyn múlik sektoryna ekspozısıasyn keńeıtýge múmkindik beretinin atap ótti.
«Samolet» toby qurylys kólemi boıynsha Reseıdegi eń iri developer bolyp tabylady. 2024 jyly Forbes Russia nusqasy boıynsha eń senimdi qurylys kompanıalary reıtıńinde birinshi orynǵa ıe boldy. Kompanıanyń 2025 jylǵy tabysy ótken jylmen salystyrǵanda 8%-ǵa ósip, 366,8 mlrd rúblge jetti. Al taza shyǵyn 2,3 mlrd rúbldi qurady, bir jyl buryn 8,2 mlrd rúbl paıda bolǵan edi.
Sońǵy kezderi qurylys kompanıasy qaryzdaryn óteýde qıyndyqtarǵa tap bolyp otyr. Kompanıa úkimetke 50 mlrd rúbl kóleminde jeńildikti nesıe berýdi surap ótinish jasaǵan, biraq bas tartylǵan.
Fonte Capital-men mámile týraly aqparat paıda bolǵannan keıin «Samolet» aksıalary bırjada 13,1%-ǵa ósip, bir danasy 419,6 rúblge jetti.
Qazaqstandyq Fonte Capital ujymdyq ınvestısıalarǵa arnalǵan qorlar qurýǵa mamandanǵan. Kompanıanyń málimetinshe, ol 24 qordy basqarady. Onyń aksıonerleri — buryn Qazaqstan qor bırjasynda basshylyq qyzmetter atqarǵan qarjyger Erjan Mýsın jáne Harper’s Bazaar men MARCO jýrnalynyń redaktory, «Mıssıs Qazaqstan Globe» sulýlyq konkýrsynyń fınalısi Ksenıa Kıbıtkına.
Buǵan deıin Fonte Capital AIX bırjasynda Fonte Bitcoin Exchange Traded Fund (ETF) bırjalyq ınvestısıalyq qorynyń lıstıńi týraly jarıalaǵan bolatyn.