Qazaqstandaǵy úı sharýashylyqtarynyń tómen jáne ortashadan tómen deńgeıde qamtamasyz etilýiniń basty sebebi — tómen jalaqy, dep habarlaıdy infohub.kz.
Ulttyq statısıka búrosynyń zertteýine sáıkes, respondentterdiń 62,1%-y qarjylyq jaǵdaıynyń nasharlyǵyn eńbekaqynyń jetkiliksizdigimen baılanystyrǵan.
Ekinshi orynda — tómen zeınetaqy, bul sebepti 33% respondent ataǵan. Taǵy 20,3% turǵylyqty jeri boıynsha turaqty aqyly jumys taba almaıtynyn aıtqan.
Basqa faktorlar qatarynda qazaqstandyqtar kez kelgen aqyly jumystyń bolmaýyn (14,9%), biliktilik nemese jumys tájirıbesiniń jetkiliksizdigin (12,7%), sondaı-aq laıyqty jumysqa ornalasý úshin bilim deńgeıiniń jetkiliksizdigin (11,5%) ataǵan.
Respondentterdiń shamamen 11%-y qarjylyq jaǵdaıynyń sebebin áleýmettik járdemaqylardyń tómendigimen baılanystyrsa, 9,5%-y densaýlyǵynyń nasharlyǵyn, al 9,2%-y nesıeler men qaryzdar, onyń ishinde ıpoteka boıynsha joǵary qaryz júktemesin ataǵan.
Zertteýge qatysýshylar balabaqshaǵa barmaıtyn mektep jasyna deıingi balalarǵa kútim jasaý qajettiligin (1,5%), tótenshe jaǵdaılar men tabıǵı apattardy (1%) jáne basqa da sebepterdi (0,7%) áldeqaıda sırek ataǵan.
Zertteý qala jáne aýyl turǵyndary arasyndaǵy aıyrmashylyqtardy da kórsetti. Qalalarda tómen qamtamasyz etilýdiń sebebi retinde tómen zeınetaqy jıi ataldy (50,1% qalada, 18,8% aýylda). Aýyldyq jerlerde, kerisinshe, turǵylyqty jeri boıynsha turaqty jumys taba almaý (25,5% aýylda, 14% qalada) jáne kez kelgen aqyly jumystyń bolmaýy (22,2% aýylda, 6,2% qalada) jıi kórsetilgen.
Sonymen qatar, er adamdar áıelderge qaraǵanda tómen qamtamasyz etilýdi tómen jalaqymen jıi baılanystyrǵan — 75,5% erlerde, 54,9% áıelderde. Al áıelder tómen zeınetaqyny (39,9% áıelderde, 20,2% erlerde) jáne áleýmettik járdemaqylardyń tómendigin (12,2% áıelderde, 8,8% erlerde) jıi ataǵan.
Aıta keteıik, Qazaqstan halqynyń naqty tabysy birinshi jartyjyldyqta nebári 0,1%-ǵa ósken, degenmen ulttyq ekonomıka mınıstrligi mundaı nátıjeniń ózin oń dep sanaıdy.